Diwali Recipe 2023 : यंदाच्या दिवाळीला करा कुरकुरीत शंकरपाळ्या! एकदम सोपी आहे रेसिपी

Diwali 2023 : दिवाळी अगदी तोंडावर आली आहे. दिवाळीमध्ये फराळ, नवे कपडे, आकाशकंदील, गोडाधोडाचे खाद्यपदार्थ यांची नुसती रेलचेल असते. दिवाळीमध्ये हमखास फराळ बनवला जातो. या फराळामध्ये विविध प्रकारचे पदार्थ आवर्जून बनवले जातात. चिवडा, चकली, करंजी, लाडू, शेव आणि शंकरपाळी.

शंकरपाळी शिवाय, दिवाळीच्या फराळाला मजा नाही हो ना. ही शंकरपाळी खुसखुशीत आणि कुरकुरीत व्हावी यासाठी अनेक महिला प्रयत्न करत असतात. आज आम्ही तुम्हाला खुसखुशीत आणि कुरकुरीत शंकरपाळी करण्याची खास रेसिपी सांगणार आहोत. चला तर मग जाणून घेऊयात ही रेसिपी.

शंकरपाळी बनवण्यासाठी लागणारे साहित्य खालीलप्रमाणे :

• साजूक तूप किंवा तेल

• चवीनुसार मीठ

• पिठी साखर (अर्धा किंवा १ वाटी)

• अर्धा किलो मैदा

• अर्धी वाटी दूध

शंकरपाळी बनवण्याची योग्य पद्धत खालीलप्रमाणे :

• सर्वात आधी एका खोलगट कढईत किंवा परातीमध्ये मैदा घ्या.

• आता या मैद्यामध्ये मीठ आणि पीठ साखर घाला.

• त्यानंतर, तुमच्या अंदाजाप्रमाणे तूप किंवा तेल घ्या.

• हे सर्व मिश्रण चांगल्या प्रकारे मिक्स करा.

• मिश्रण चांगले एकजीव होण्यासाठी त्यामध्ये लागेल तसे दूध घाला.

• दूधामुळे शंकरपाळीचे पीठ मऊ होण्यास मदत होते आणि ते जास्त घट्ट होत नाही.

• आता तुमचे पीठ चांगले एकजीव करून मळून घ्या.

• आता १०-१५ मिनिटांसाठी हे पीठ झाकून ठेवा.

• दुसऱ्या बाजूला कढई किंवा खोलगट पॅनमध्ये तूप किंवा तेल घालून कढई गरम करायला ठेवा.

• त्यानंतर, शंकरपाळीच्या पीठाचे गोळे बनवून घ्या.

• आता एक गोळा लाटून घ्या. आता सुरीच्या मदतीने तुम्हाला हव्या त्या आकारात शंकरपाळी कापून घ्या.

• आता या कापलेल्या शंकरपाळीचे तुकडे कढईमध्ये गरम तेलात किंवा तूपात घालून तळून घ्या.

• सोनेरी रंग येईपर्यंत शंकरपाळी खरपूस पद्धतीने तळून घ्या आणि गरमागरम सर्व्ह करा.

• तुमची खुसखुशीत आणि कुरकुरीत शंकरपाळी तयार आहे.