Diwali Recipe : चकल्या नेहमीच बिघडतात तर अशी बनवा परफेक्ट चकली भाजणी, रेसिपी सेव्ह करून ठेवा

Diwali Recipe :

दिवाळीच्या फराळातील सर्वात आवडता पदार्थ कोणता असेल तर तो चकली. हे उत्तर सर्वांचेच असते. दिवाळी संपली तरी लोक अनेक दिवस चहासोबत चकली खाऊन वेगळाच आनंद घेत असतात. खमंग खुसखुसीत अन् थोडी तिखट असलेली चकली पौष्टिकही असते.

कारण, यामध्ये वेगवेगळ्या प्रकारचे जिन्नस असतात. जे तुमच्या आरोग्यासाठीही फायदेशीर असतात. पण, चकलीच्या भाजणीत एखादा पदार्थ जास्त झाला तरी चकली बिघडू शकते. त्यामुळेच, चकलीची भाजणी कशी बनवायची याची सोपी ट्रिक आपण पाहणार आहोत.

भाजणीचे साहित्य : (Chakali Bhajani Recipe)

 २ किलो जाडे तांदूळ, १ किलो हरभरा डाळ, अर्धा किलो उडीद डाळ, १०० ग्रॅम धने, ५० ग्रॅम जिरे.

कृती :

 तांदूळ स्वच्छ निवडून धुवावेत व कपड्यावर वाळत घालावेत.

हरभरा डाळ व उडीद डाळ वेगवेगळी धुवून कपड्यावर वाळत घालावी.

सर्व जिन्नस एक दिवसभर चांगले वाळले की दुसऱ्या दिवशी कढईमध्ये मंद आचेवर हलक्या गुलाबी रंगावर भाजावेत.

धने भाजून त्यात मिसळावे व जिरे न भाजता तसेच मिसळावे.

भाजणी गिरणीतून बारीक दळून आणावी.

भाजणी भाजताना कच्ची राहता कामा नये व डाळी करपता कामा नयेत. बेताचे मंद भाजावे म्हणजे भाजणी खमंग होते.

भाजणी बरेच दिवस टिकते. त्यामुळे एकावेळी जास्त करून घट्ट झाकणाच्या डब्यात ठेवावी व जरुरीनुसार हवी तेवढी काढून चकल्या कराव्यात.

भाजणी दळताना एकदम बारीक दळून आणावी व मैद्याच्या चाळणीने चाळून घ्यावी.

भाजणीकरता जाड तांदूळ वापरावेत म्हणजे भाजणी फुलते व चिकट होते. आंबेमोहोर किंवा तत्सम सुवासिक तांदूळ वापरायची आवश्यकता नाही.