Green chilli thecha recipe: महाराष्ट्रीयन पद्धतीने झनझनीत हिरव्या मिरचीचा ठेचा कसा तयार करायचा ?

गावाकडे जर भाजी तयार नसेल तर भाजीला उत्तम पर्याय म्हणजे ठेचा असतोच.त्यामुळे गावातील प्रत्येकाला आजही हिरवी मिरची ठेचा हा आपलासा वाटतो.

हिरव्या मिरचीचा ठेचा हा खायला खूपच भारी लागतो. याची चव बराच वेळ जिभेवर रेंगाळत राहते आणि तिखटपणा म्हणजे चटका आठवणीत राहतो.

चला तर मग आज जाणून घेऊया या हिरव्या मिरचीची ठेचा कसा करायचा याची रेसिपी.

साहित्य :

1) अर्धा पाव हिरवी मिरची

2) अर्धा वाटी शेंगदाणे

3) लसूण

4) तेल

5) जीरे

6) मीठ

7) लिंबाचा रस

कृती:

सर्वप्रथम पहिले हिरव्या मिरच्यांचे देठ काढून त्या स्वच्छ पाण्याने धुवून घाव्या.नंतर त्या धुतलेल्या मिरच्यांचे बारीक तुकडे करून घ्यावे.त्यानंतर एका लोखंडी कढईत तेल गरम करावे. तेल गरम झाले की हिरव्या मिरची बारीक केलेले तुकडे निट भाजून घ्यावे. नंतर लसूण आणि शेंगदाणे देखील चांगले खरपूस भाजून घ्यावे.

भाजलेल्या मिरच्या आणि शेंगदाणे लसूण नीट मिक्स करावे. हे मिश्रण थंड झाल्यावर खलबत्त्यात ठेचा (खलबत्त्यात ठेचून केला जातो म्हणूनच याला ठेचा म्हणतात) याचा तिखटपणा कमी करण्यासाठी वरून लिंबाचा रस घालावा. आपला हा हिरव्या मिरचीचा ठेचा तयार आहे.

तुम्ही हा ठेचा गरमागरम भाकरी ,पोळीसोबत खाऊ शकता.