Rava Dosa Recipe : डाळ-तांदूळ भिजवण्याची झंझंट नकोच, रवा अन् बटाट्याचा बनवा क्रिस्पी डोसा

रोजच्या जीवनात कधीही टाळू नये तो आहार म्हणजे सकाळचा नाश्ता. नाश्त्यामुळे दिवसभर उत्साही राहण्यासाठी मदत होते. त्यामुळं सकाळचा नाश्ता हा भरपूर पोषकतत्वं असलेला असावा असं अनेक आहार तज्ज्ञ सांगतात. त्यामुळे घरातील महिलावर्गाला नेहमी प्रश्न पडतो तो म्हणजे काय बनवायचं. त्यात कामाला जाणाऱ्या महिला वर्गाचा गोंधळ अधिक होत असतो. पण याच घाईगडबडीत तुम्हाला काहीतरी टेस्टी झटपट ना बनवायचा असेल तर तुमच्यासाठी खास रेसिपी घेऊन आलो आहोत. रवा अन् बटाट्याचा डोसा. कसा बनवायचा जाणून घेऊ.

रवा अन् बटाट्याचा डोसा बनवण्यासाठी लागणारे साहित्य

रवा अर्धा कप (घरातील व्यक्तींनुसार)

२ बटाटे (घरातील व्यक्तींनुसार)

२ हिरव्या मिरच्या

मीठ चवीनुसार

अडीच कप पाणी

अर्धा कप तांदळाचे पीठ

बारीक चिरलेला कांदा

बारीक चिरलेली कोथिंबीर

जिरे

बारीक केलेली लाल मिरची

डोसा बनवण्याची कृती

रवा आणि बटाट्याचा क्रिस्पी डोसा बनवण्यासाठी बटाटे सोलून धुवून घ्या. त्यानंतर बटाट्याच्या फोडी करुन घ्या. त्यानंतर बटाट्याचे तुकडे, हिरवी मिरची, मीठ घालून पेस्ट तयार करा. पाणी घालून बारीक पेस्ट बनवा. आता या पेस्टमध्ये अर्धा कप रवा आणि अर्धा कप तांदळाचे पीठ घालून चांगले मिक्स करा.

त्यात बारीक चिरलेला कांदा, हिरवी मिरची, कोथिंबीर, एक चमचा जिरे आणि चवीनुसार मीठ घाला. तुम्हाला आवडत असेल तर तुम्ही यात बारीक चिरलेली शिमला मिरची आणि बारीक चिरलेले टोमॅटो सुद्धा घालू शकता. आता हे पीठ थोडे पातळ करा. जेणेकरून चमच्याने ते पसरवता येईल. नॉनस्टिक पॅनवर चमचाच्या साहाय्याने पीठ टाका आणि नीट पसरवा. अवघ्या काही मिनिटातचं तुमचा क्रिस्पी डोसा तयार होईल.