Diwali Recipe: दिवाळी स्पेशल पारंपरिक पद्धतीने खजुऱ्या कशा तयार करायच्या?

पश्चिम महाराष्ट्रात  आणि मराठवाड्यात खजुऱ्या हा गोड पदार्थ सणासुदीला आवर्जून केला जातो. बाजरी हे पिकं पश्चिम महाराष्ट्र आणि मराठवाड्यात मोठ्या प्रमाणात घेतले जाते.

बाजरी हे धान्य खायला उबदार आणि उष्ण असल्यानं महाराष्ट्रातील काही भागांमध्ये दिवाळीच्या बोचऱ्या थंडीत शरीराला उब मिळावी म्हणून दिवाळीचे फराळ करतांना मोठ्या प्रमाणात बाजरीचा उपयोग केला जात असे.

घरच्याच उसाचा गुळ आणि घरच्याच वावरातील बाजरी ,घरच्याच गाईचे तूप वापरून जुण्या काळात पौष्टिक खजुऱ्या केल्या जात असे, या खरपुस खजुऱ्या घरातील प्रत्येक जण आवडीने काही ..

आपण दिवाळी स्पेशल खास पारंपरिक पदार्थाच्या काही वेगवेगळ्या रेसिपी पाहणार आहोत त्यातील पहिली रेसिपी आहे, दिवाळी स्पेशल पारंपरिक पद्धतीने खजुऱ्या कशा तयार करायच्या?

चला तर मग पाहू या ही पारंपरिक रेसिपी कशी तयार करायची याची सविस्तर माहिती...

साहित्य : 

1) दोन वाटी बाजरीचं पीठ

2) एक वाटी गव्हाचं पीठ 

3) एक वाटी बारीक किसलेला गूळ

4) वेलची पूड

5) तीळ

6) तूप

कृती: 

प्रथम बाजरीचं पीठ बारीक चाळणीने चाळून घ्यावं. त्यानंतर गव्हाचं पीठसुद्धा चाळून घालावं. 

चाळलेले दोन्ही पीठ एकत्र करून त्यात थोडी वेलची पूड किंवा जायफळ टाकावे. 

नंतर गूळ थोड्या पाण्यात विरघळून घ्यावा. नंतर मग ते गुळाचं पाणी आणि तीळ टाकून हे पीठ चांगलं मळून घ्यावं. पीठ मळल्यानंतर दहा पंधरा मिनिटं झाकून ठेवुन मुरू द्यावं. 

नंतर त्याची एकसारखी कोळपाटावर मोठी पोळी लाटुन घ्यावी. शंकरपाळ्याच्या चमच्याने त्या पोळीच्या चौकोनी वड्या कापाव्यात. आणि त्या वड्या तुपात खमंग तळून घ्याव्यात.