Veg Cutlets Recipe : नाश्त्याला बनवा चविष्ट व्हेज कटलेट्स, एकदम सोपी आहे रेसिपी

Veg Cutlets Recipe : सकाळच्या नाश्त्यामध्ये रोज खायला काय करावे? असा प्रश्न आपल्याला सतत पडत असतो. बर नेहमीच ते पोहे, उपमा, इडली आणि सॅंडवीच खाऊन अनेकांना कंटाळा आलेला असतो. काहीतरी हेल्दी आणि टेस्टी खायला सगळ्यांनाच आवडते.

जर तुम्हाला सकाळच्या नाश्त्यामध्ये काहीतरी टेस्टी आणि हेल्दी पर्याय हवा असेल, तर आज आम्ही तुमच्यासाठी खास रेसिपी घेऊन आलो आहोत. या रेसिपीचे नाव आहे व्हेज कटलेट्स. सकाळच्या नाश्त्यामध्ये झटपट बनवण्यासाठी हा एक उत्तम पर्याय आहे. सकाळच्या नाश्त्यामध्ये किंवा संध्याकाळच्या नाश्त्यामध्ये देखील तुम्ही ही रेसिपी बनवू शकता. चला तर मग जाणून घेऊयात या रेसिपीबद्दल.

व्हेज कटलेट्स बनवण्यासाठी लागणारे साहित्य खालीलप्रमाणे :

• अर्धा कप मैदा

• कोबी (बारीक चिरलेला)

• गाजर (बारीक चिरलेला)

• फरसबी (बारीक चिरलेली)

• शिमला मिरची (आवश्यकतेनुसार)

• १ बटाटा (उकडलेला)

• जिरे

• आलं-लसणाची पेस्ट

• ४-५ हिरव्या मिरच्या (बारीक चिरलेल्या)

• लाल तिखट अर्धा चमचा

• मीठ

• कटलेट्सच्या कोटिंगसाठी ब्रेड क्रंम्ब्स

• तेल

व्हेज कटलेट्स बनवण्याची योग्य पद्धत खालीलप्रमाणे :

• सर्वात आधी एका पॅनमध्ये किंवा कढईमध्ये तेल गरम करा.

• या तेलामध्ये जिरे आणि आलं-लसणाची पेस्ट टाका.

• आता यामध्ये बारीक चिरलेल्या भाज्या (फरसबी, कोबी, गाजर, शिमला मिरची)सोनेरी होईपर्यंत तेलात परतून घ्या.

• त्यानंतर, या मिश्रणात बारीक चिरलेली हिरवी मिरची, कोथिंबीर आणि लाल तिखट, मीठ घाला.

• आता हे मिश्रण चांगले परतून घेतल्यानंतर थंड व्हायला ठेवा.

• आता या मिश्रणात उकडलेला किंवा उकडून स्मॅश केलेला बटाटा घाला.

• आता या मिश्रणाचे गोल आकारात किंवा तुमच्या आवडीच्या आकारात कटलेट्स बनवून घ्या.

• आता या कटलेट्सवर थोडा मैदा पसरवा.

• त्यानंतर, ब्रेड कंम्ब्रसमध्ये ते कोट करून घ्या.

• आता दुसऱ्या बाजूला कढई गरम करायला ठेवा.

• त्यात तेल घालून हे व्हेज कटलेट्स सोनेरी होईपर्यंत तळून घ्या.

• तुमचे गरमागरम व्हेज कटलेट्स तयार आहेत.

• चटणीसोबत किंवा टोमॅटो सॉससोबत गरमागरम सर्व्ह करायला घ्या.