Sweet potato sheera : पौष्टिक असणाऱ्या रताळ्याचा शिरा कसा तयार करायचा ?

रताळे (Sweet potato) खाण्याचे आरोग्यदायी फायदे : रताळे यामध्ये कॅन्सरशी लढणारे घटक असल्याचे अनेक अभ्यासकांनी म्हटले आहे. यातील प्रोटिझ इनहिबिटर हे प्रथिने कॅन्सर पेशींच्या वाढीला थांबवण्याची क्षमता या प्रथिनेमध्ये असल्याचे वैज्ञानिकांना आढळले आहे. रताळ्यांमध्ये तंतुमय मेद मोठ्या प्रमाणात असल्यामुळे पचनक्रिया सावकाश पद्धतीने सुरू राहून लवकर भूक लागत नाही. यामुळे रक्तातील साखरेची पातळीही नियंत्रित राहते.

रताळेमध्ये मोठ्या प्रमाणावर जीवनसत्व अ असते. आपले डोळे आणि त्वचेचे आरोग्य राखण्यासाठी हे महत्वाचे जीवनसत्व असल्याने आजारपणही जास्त उद्भवत नाही. रताळ्याच्या केशरी आवरणामध्ये बिटा केरोटिन हे अँटिऑक्सिडंट असते. त्यामुळे कॅन्सर तसंच डोळ्यांच्या आजारांचा धोका टळतो. यातील जीवनसत्व क खाणाऱ्याच्या शरीरातील रोगप्रतिकारक शक्ती वाढवते. तर, पोटॅशियममुळे रक्तदाब नियंत्रणात राहण्यासह कॅल्शिअममुळे हाडांना मजबुती मिळते.

चला तर मग या बहूगुणी पौष्टिक असणाऱ्या रताळ्याचा शिरा कसा तयार करायचा ?

साहित्य :

1) दोन वाटी किसलेलं रताळं

2) दोन वाटी दूध

3) दोन चमचे साजूक तूप

4) चवीनुसार साखर

5) वेलची पूड,

6) दोन चमचे ताजा खोवलेला नारळ

7) काजू- बदामाचे बारीक काप

8) केशर

कृती :

सर्वप्रथम रताळ स्वच्छ पाण्याने धूवून निट पुसून घ्यावे. नंतर शिलणीने सोलून आणि कसणीवर बारीक किसून घ्यावे. (रताळं किसायला जर तुम्हाला वेळ नसेल तर ते रताळं उकडून मग कुस्करून घेतलं तरीही चालेल)

तोपर्यंत एका कढईत तूप गरम करायला ठेवावं, तुप गरम झाल की, यात बारीक किसलेलं रताळं घालून नीट परतून घ्यावं.

मिश्रणाचा रंग जरा बदला की, त्यात दूध घालावं आणि त्याला एक चांगली उकळी येऊ द्यावी.

उकळी आल्यानंतर त्यात आपल्या आवडीनुसार साखर घालावी.

आता हे मिश्रण नीट ढवळून एकत्र करून घ्यावं.आणि मंद गॅसवर दुधात रताळं नीट शिजू दयाव.

रताळं अगदी शिजत शिजत आल्यावर मग त्यात खोवलेलं खोबरं, वेलची पूड आणि काजू-बदामाचे बारीक काप आणि केशर घालावेत. त्याला एक हलकीशी वाफ आल्यावर गॅस बंद करावा.

टिप: हा रताळ्याचा शिरा कोरडा करण्यापेक्षा जरा ओलसरच करावा. ‌