Karad Ganesh Visarjan : गणेशमूर्ती विसर्जनासाठी कराडात मोठा उत्साह; आतापर्यंत 109 गणेश मंडळांच्या मूर्तींचे विसर्जन

कराड : गणेश मूर्ती विसर्जनासाठी कराडमध्ये (Karad Ganesh Visarjan) मोठा उत्साह दिसत आहे. वाद्यांच्या गजरात आणि गणपती बाप्पाच्या जय घोषात विसर्जन मिरवणुका सुरू असून कराडमधील मुख्य चावडी चौकात मिरवणूक पाहण्यासाठी मोठी गर्दी झाली आहे.

विविध मंडळाकडून झांजपथक, पारंपरिक वाद्य यांना पसंती दिल्याचे चित्र आहे. रात्री साडेदहा वाजेपर्यंत सार्वजनिक गणेश मंडळांच्या मूर्तीचे विसर्जन करण्यात आले. विसर्जनासाठी चावडी चौकातून कृष्णा घाटाकडे जाणाऱ्या मंडळांना पालिकेतर्फे नारळ, रोप देऊन त्यांचे स्वागत करण्यात येत आहे.

अतिरिक्त पोलीस अधीक्षक डॉ. वैशाली कडुकर, प्रांताधिकारी अतुल म्हेत्रे, पोलीस उपाधिक्षक अमोल ठाकूर, तहसीलदार कल्पना ढवळे, वरिष्ठ शहर पोलीस निरीक्षक के. एन. पाटील, पालिकेचे मुख्याधिकारी शंकर खंदारे यांच्यासह वरिष्ठ अधिकारी उपस्थित आहेत. विसर्जन मिरवणुकीत मोठा पोलीस बंदोबस्त तैनात करण्यात आला आहे. रात्री साडेदहा वाजेपर्यंत 109 गणेश मंडळाच्या मूर्तींचे विसर्जन करण्यात आले.