Konkan Ganpati Visarjan : वादात सापडलेला दापोलीतील विसर्जन घाट 'या' कारणामुळं केला बंद; तलावाभोवती घातलं कुंपण

दाभोळ : सुमारे ७० लाखांहून अधिक खर्च करूनही दापोली शहरातील आसऱ्याच्या पुलाजवळील गणेश विसर्जन घाट यावर्षी दापोली नगरपंचायतीने (Dapoli Nagar Panchayat) प्रस्तावित दुरुस्तीच्या कारणामुळे बंद केला आहे. स्टेट बॅंकेसमोरील गणेश विसर्जन घाटावर भाविकांनी आपल्या गणेशमूर्ती विसर्जन कराव्यात, असे आवाहन करणारा फलक या ठिकाणी लावण्यात आला आहे.

दापोली नगरपंचायतीने आसऱ्याच्या पुलाजवळील भागाचे सौंदर्यीकरण केले होते. यासाठी सुमारे ७० लाखांचा निधी खर्च करण्यात आला होता. याठिकाणी गणेशमूर्तींचे विसर्जन (Ganpati Visarjan 2023) करण्यासाठी एक तलावही बांधण्यात आला होता, मात्र सौंदर्यीकरण करण्यासाठी केलेला खर्च वादात सापडला होता.

या तलावातील पाणी मुरत असल्याने या तलावात गणेश मूर्तींचे विसर्जन करण्यासाठी पुरेसा पाण्याचा साठा शिल्लक राहत नसल्याने विसर्जित केलेल्या गणेश मूर्ती दिसू लागल्यावर नगरपंचायतीने पुढील वर्षी या तलावात पाण्याचा साठा टिकून राहण्यासाठी तलाव भरण्याअगोदर त्यात प्लास्टिक लावले. गेल्यावर्षीपर्यंत या तलावात गणेशमूर्तींचे नागरिकांकडून विसर्जन केले जात होते.

विसर्जित केलेल्या मूर्ती पुन्हा तलावातील पाण्यातून बाहेर काढून रातोरात दाभोळ खाडीतील पाण्यात विसर्जन करण्याचे काम नगरपंचायत प्रशासन करत होते. यावर्षी मात्र हा तलावाभोवती कुंपण घालण्यात आले असून विसर्जन घाटाचे काम प्रस्तावित असलेने विसर्जन घाट बंद आहे.

श्री गणेश मूर्तींच्या विसार्जनाकरिता पर्यायी व्यवस्था नर्सरी रोडवरील तलाव व स्टेट बँके समोरील विसर्जन घाट येथे करण्यात आली असल्याच्या फलक नगरपंचायत प्रशासनाने लावला आहे. यामुळे यावर्षी दीड दिवसांच्या व पाच दिवसांच्या गणेशमूर्तींचे विसर्जन या पर्यायी ठिकाणी करण्यात आले आहे.