अफगाणिस्तानचा पैसा ९/११ हल्ल्यातील बळींच्या कुटुंबाला देण्याला विरोध

काबूल : अफगाणिस्तान सरकारच्या अमेरिकेत असलेल्या संपत्तीपैकी सात अब्ज डॉलरची संपत्ती मुक्त करून त्यापैकी साडे तीन अब्ज डॉलर ९/११ हल्ल्यात बळी पडलेल्यांच्या कुटुंबीयांना देण्याच्या अध्यक्ष ज्यो बायडेन यांच्या निर्णयाच्या विरोधात काबूलमध्ये नागरिकांनी जोरदार निदर्शने केली. अफगाण जनतेचा पैसा इतरांना देण्याचा अमेरिकेला कोणताही अधिकार नाही, असा दावा आंदोलकांनी केला.

अफगाणिस्तानची नऊ अब्ज डॉलरची संपत्ती विदेशांमध्ये असून त्यापैकी सात अब्ज डॉलर अमेरिकेतच आहे. तालिबानने गेल्या वर्षी ऑगस्टमध्ये सत्ता काबीज केल्यावर अमेरिकेने ही संपत्ती गोठविली होती.

ज्यो बायडेन यांनी ही संपत्ती मुक्त करत त्यातील निम्मी रक्कम अफगाणिस्तानमध्ये मानवतावादी मदतीसाठी, तर निम्मी रक्कम अल कायदाने ११ सप्टेंबर २००१ ला वर्ल्ड ट्रेड सेंटरवर केलेल्या हल्ल्यात मृत्युमुखी पडलेल्यांच्या कुटुंबीयांना नुकसानभरपाई म्हणून देण्याचा निर्णय घेतला.

या निर्णयाला अफगाणिस्तान नागरिकांनी विरोध केला आहे. अमेरिकेच्या हल्ल्यात बळी पडलेल्या अफगाण नागरिकांबाबत अमेरिकेने कोणताही विचार केलेला नाही. अमेरिकेत असलेला पैसा अफगाणिस्तान नागरिकांचा आहे, अमेरिकेला त्याचा वापर करण्याचा कोणताही अधिकार नाही, असा दावा निदर्शकांनी केला आहे.

हा पैसा अफगाणिस्तानच्या जनतेला परत देणे आवश्‍यक आहे. मानवतावादी मदतीसाठी तो नाही. बायडेन यांचा निर्णय एकतर्फी आणि आंतरराष्ट्रीय कायद्याला धरून नाही.

- तोरेक फरहादी, अफगाणिस्तानचे माजी अर्थ सल्लागार