Donald Trump : ट्रम्प यांच्यावर पुन्हा हल्ल्याचा प्रयत्न?परिषदेच्या जवळ चाकू घेऊन आलेल्यास ठार केले

मिलवाऊकी : अमेरिकेचे माजी अध्यक्ष डोनाल्ड ट्रम्प हे उपस्थिती असलेल्या रिपब्लिकन पक्षाच्या परिषदेच्या ठिकाणी चाकू घेऊन आलेल्या व्यक्तीला पोलिसांनी गोळ्या घालून ठार मारले. ट्रम्प यांच्यावर गोळीबार झाल्याच्या घटनेनंतर तीन दिवसांतच हा प्रकार घडल्याने त्यांच्यावर पुन्हा एकदा हल्ला करण्याचा प्रयत्न म्हणून या घटनेकडे पाहिले जात आहे.

रिपब्लिकन पक्षाची येथे चार दिवसीय परिषद सुरू असून ट्रम्प यांच्यासह या पक्षाचे सर्व मोठे नेते यासाठी उपस्थित आहेत. गोळीबारात ट्रम्प यांच्या कानाला दुखापत झाली असतानाही ते येथे हजर असून त्यांच्या सुरक्षेत वाढ करण्यात आली आहे. असे असतानाही आज परिषदेच्या ठिकाणी एक व्यक्ती दोन्ही हातांमध्ये चाकू घेऊन आल्याचे पोलिसांना दिसले. पोलिसांनी त्याला थांबण्याचा इशारा देऊनही तो एका व्यक्तीच्या अंगावर हल्ला करण्याच्या उद्देशाने धावून गेला. त्यामुळे पोलिसांनी तत्काळ गोळीबार करत त्याला ठार केले. हल्लेखोराचे नाव सॅम्युएल शार्प असे असल्याचे समजते.

नागरिकांमध्ये नाराजी

ट्रम्प यांच्या सुरक्षेसाठी विविध राज्यांमधील पोलिसांनाही पाचारण करण्यात आले आहे. नागरिकांनी याला आक्षेप घेतला आहे. परिषद आयोजित केलेल्या भागात अनेक बेघर लोक तंबूत राहतात. स्थानिक पोलिसांना हे माहिती असल्याने ते परिस्थिती योग्य प्रकारे हाताळतात. मात्र, बाहेरच्या पोलिसांनी कोणतीही चौकशी न करता केवळ चाकू हातात दिसला म्हणून गोळ्या मारल्या, अशी टीका नागरिकांनी केली.

इराणकडून कट?

वॉशिंग्टन : डोनाल्ड ट्रम्प यांच्या जिवाला इराणपासून धोका असल्याचा गुप्तचरांचा अहवाल आल्यामुळेच ट्रम्प यांच्या सुरक्षेत वाढ करण्यात आल्याचे एका वरिष्ठ अधिकाऱ्याने सांगितले. हा इशारा ट्रम्प यांच्यावर हल्ला होण्याच्या आधीच मिळाला होता, असेही त्यांनी सांगितले. ट्रम्प हे अध्यक्ष असताना त्यांनी २०२० मध्ये इराण सैन्याचे प्रमुख कासिम सुलेमानी यांच्यावरील हल्ल्याचे आदेश दिले होते. तेव्हापासूनच ट्रम्प यांना इराणपासून धोका असल्याचे मानले जाते.