ब्रिटनच्या नागरिकांसाठी ‘हॅप्पी मंडे’; कोरोना निर्बंध शिथिल होण्यास सुरुवात

लंडन-  कोरोना संसर्गवाढीमुळे वर्षाच्या सुरुवातीपासूनच पुन्हा एकदा लॉकडाऊनला सामोरे गेलेल्या ब्रिटनमध्ये आजपासून निर्बंध शिथील होण्यास सुरुवात झाली आहे. आता नागरिक एकमेकांना इतर ठिकाणी भेटू शकणार असून अनेक क्रीडाप्रकारांनाही परवानगी देण्यात आली आहे. ब्रिटनमध्ये जवळपास गेल्या तीन महिन्यांपासून ‘स्टे ॲट होम’चे आदेश लागू होते. नागरिकांना सार्वजनिक ठिकाणी एकमेकांना भेटण्यास परवानगी नव्हती. या काळात संसर्गाचे प्रमाण वेगाने खाली आले. त्यामुळे आता दोन कुटुंबांना किंवा सहा जणांना उद्याने किंवा इतरत्र भेटण्यास परवानगी देण्यात आली आहे. निवडक क्रीडा प्रकारांनाही परवानगी देण्यात आली आहे. त्यामुळे गेल्या तीन महिन्यांपासून घरातच अडकून पडलेल्या अनेक नागरिकांनी आज बाहेर पडत फिरण्याचा आनंद घेतला. अनेकांनी रात्री १२ वाजून एक मिनिटांनीच खेळण्यास सुरुवात केली. टेनिस कोर्ट, जलतरण तलावांना नागरिकांनी पसंती दिली. प्रवास निर्बंधही हटविल्याने अनेक जणांना समुद्र किनाऱ्यांवर गर्दी केली होती.

ब्रिटनमध्ये कोरोना संसर्गामुळे आतापर्यंत सव्वा लाखांहून अधिक जणांचा मृत्यू झाला असून युरोपमधील ही सर्वोच्च संख्या आहे. लॉकडाऊनच्या काळात नव्या रुग्णांची संख्या वेगाने घटली. आज (ता. २९) ब्रिटनमध्ये ३,८७२ नवे रुग्ण आढळले. गेल्या सहा महिन्यांतील ही नीचांकी संख्या आहे. रुग्णसंख्या कमी झाली असली तरी नागरिकांनी सावध रहावे, असा इशारा ब्रिटनचे पंतप्रधान बोरीस जॉन्सन यांनी दिला आहे.

सुएझ कालव्यामुळे झाली दोन युद्ध; ब्रिटन-फ्रान्सला पाडलं उघडं

दरम्यान, ब्रिटनमध्ये कोरोनाची दुसरी लाट आल्याने पुन्हा लॉकडाऊन जाहीर करण्यात आला होता. पण, आता कोरोना रुग्णसंख्या कमी झाल्यामुळे निर्बंध शिथिल केले जात आहेत. दुसरीकडे जगातील काही देशांमध्ये कोरोनाची दुसरी लाट आल्याचे दिसून येतंय. भारतामध्ये कोरोना रुग्णसंख्या मोठ्या प्रमाणात वाढू लागली आहे. त्यामुळे देशात अनेक निर्बंध लादण्यात आले आहेत. शिवाय काही राज्यांमध्ये लॉकडाऊनची शक्यता व्यक्त केली जात आहे. ब्रिटनमध्ये लसीकरणाने वेग घेतला होता. तरुणांनाही कोरोनाची लस देण्यात आली आहे. त्यामुळे ब्रिटनमध्ये कोरोनाचा प्रादुर्भाव कमी झाल्याचं सांगितलं जातंय.