चीनला धास्ती! देशात आढळला कोरोनाचा नवा व्हेरिअंट ओमिक्रॉनचा पहिला रुग्ण

बीजिंग : कोरोनाव्हायरसचा (Coronavirus) नवीन व्हेरियंट ओमिक्रॉनमुळं (Covid Omicron variant) कोव्हिड रुग्णसंख्या वाढण्याची भीती जागतिक आरोग्य संघटनेनं व्यक्त केलीय. यामुळं जगभरात भीतीचं वातावरण निर्माण झालंय. जगभरात आतापर्यंत डेल्टा व्हेरियंटचा प्रभाव जास्त दिसून येतोय. ओमिक्रॉनचा पहिला बळी यूकेमध्ये झाला आहे. दरम्यान, डेल्टा व्हेरियंटच्या उद्रेकाने चीनमध्ये ओमिक्रॉनचं पहिलं प्रकरण समोर आलंय. बाधित व्यक्ती उत्तरेकडील तियानजिन शहरातील (Tianjin City) आहे.

ग्लोबल टाइम्सच्या अहवालात सोमवारी चीनची एजन्सी सीजीटीएन-टीव्हीच्या अहवाल्यानं म्हटलंय, की उत्तर चीनमधील तियानजिन शहरात ओमिक्रॉनचं पहिलं प्रकरण समोर आलंय. संक्रमित नुकतेच दक्षिण आफ्रिकेतून (South Africa) परतले होते. त्याला तत्काळ वेगळं करण्यात आलं असून त्याच्यावर उपचार सुरू आहेत. मात्र, रुग्ण आणि त्याच्या प्रकृतीबाबत अजून काहीही सांगण्यात आलेलं नाही. चीनच्या (China) झेजियांग प्रांतात कोरोनाच्या डेल्टा व्हेरियंटच्या 'सब-लीनिएज AY.4' या नवीन जातीची प्रकरणं आढळून आली आहेत. या प्रांतात स्थानिक पातळीवर संसर्गाची 138 प्रकरणे नोंदवली गेली आहेत. तर, पूर्व प्रांतातील लोकांना प्रवास करण्यास मनाई करण्यात आलीय.

जीनोम सिक्वेन्सिंग आणि विषाणू अभ्यासातून असं दिसून आलंय, की तिन्ही शहरांमध्ये संसर्गाची प्रकरणं डेल्टा स्ट्रेन सब लीनिएज AY.4 मुळं झाली होती, जी नोबेल कोरोना विषाणूपेक्षा जास्त संसर्गजन्य मानली जाते. चीनमध्ये डेल्टा व्हेरियंटचा नवीन स्ट्रेन आढळण्याची ही पहिलीच वेळ आहे. झेजियांग प्रांताचे मुख्यालय असलेल्या हांगजोऊ येथून मिळालेल्या अहवालानुसार, प्रांतातील 138 प्रकरणांपैकी 44 प्रकरणं निंग्बोमधील, 77 प्रकरणं शाओक्सिंग आणि 17 प्रकरणं हांगजोऊमधील आहेत. तर, पूर्व प्रांतातील लाखो लोकांच्या प्रवासावर अधिकाऱ्यांनी बंदी घातलीय.