मालदीवमधील कोरोना संपला; पर्यटन महोत्सवात मंत्र्यांची घोषणा

मुंबई : मालदीवमधील कोरोना (corona end in Maldives) संपल्याची घोषणा अध्यक्षांनीच केल्याने आता भारतीय पर्यटकांनी (Indian Tourist) तेथे निःशंकपणे यावे, असे आवाहन मालदीवचे पर्यटनमंत्री अब्दुल्ला मोसूम (Abdulla Mosum) यांनी येथे आयोजित पर्यटन महोत्सवात केले. हा महोत्सव दोन वर्षांनंतर होत आहे.

फेअरफेस्ट मिडियातर्फे आयोजित तीन दिवसांच्या एशिया पॅसिफिक ट्रॅव्हल शो ला आज गोरेगावच्या एनईएस संकुलात सुरुवात झाली. या प्रदर्शनात २० देशांमधील पर्यटनाशी संबंधित सुमारे सहाशे ते सातशे संस्थांनी आपले स्टॉल लावले आहेत. उद्घाटनप्रसंगी तमिळनाडूचे पर्यटनमंत्री एम. मतीवेंथन फेअरफेस्टचे अध्यक्ष संजीव अग्रवाल, अझरबैजान, नेपाळ आदी देशांचे मंत्री-अधिकारी हजर होते.

कोरोनामुळे गेली दोनवर्षे हा महोत्सव होऊ शकला नाही. त्या पार्श्वभूमीवर आज त्याला मिळालेले यश उत्साहवर्धक आहे, आता भारतातूनही आंतरराष्ट्रीय विमानोड्डाणे सुरु होत असल्याने भारतीय पर्यटकांचे परदेशांनी निःशंकपणे स्वागत करावे, असे अग्रवाल म्हणाले. या महोत्सवात कोरिया, सिंगापूर, मालदीव, सेशल्स, ग्रीस, थायलँड, श्रीलंका, फिजी, कतार, अझरबैजान, नेपाळ आदी देशांप्रमाणेच भारतातील उत्तर प्रदेश, मध्य प्रदेश, हिमाचल प्रदेश, उत्तराखंड, राजस्थान, गुजरात, गोवा, लडाख, कर्नाटक, आसाम, ओरिसा, तमिळनाडू, मध्य प्रदेश आदी राज्यांचे स्टॉल होते. तेथे पर्यटनस्थळे, हॉटेल आदींचे अनेक आकर्षक चलतचित्रे तसेच छायाचित्रे होती.

यात टूर अँड ट्रॅव्हल कंपन्या, हॉटेल, पर्यटन संघटना, डेस्टिनेशन मॅनेजमेंट कंपन्या, मुंबईच्या फिल्मसिटीचे बॉलिवूडपार्क आदींनी व्यवसायवृद्धीसाठी या महोत्सवाचा फायदा करून घेतला. अनेक इच्छुक व्यक्तींनी तेथे संपर्क साधला होता.