पोटदुखीमुळे दवाखान्यात आला अन् पोटात निघालं किलोभर 'लोखंड'

वैद्यकीय क्षेत्रात काम करताना डॉक्टरांसमोर रोज नवी आव्हानं येत असतात. वेगवेळ्या आजारांवर उपचार करताना डॉक्टरांना रोज वेगवेळ्या गोष्टींना सामोरं जावं लागतं. अशाच एका प्रकरणात डॉक्टरांनी विचित्र आजाराने ग्रासलेल्या एका व्यक्तीला वाचवलं आहे. या व्यक्तीला लोखंडी वस्तू खायला आवडत असल्याची धक्कादायक बाब डॉक्टरांनी दिलेल्या माहितीमधून समोर आली आहे.

यूरोपच्या लिथुआनिया मध्ये घडलेल्या या घटनेत एका व्यक्तीला काही दिवसांपासून पोट दुखीचा त्रास होत होता. त्यानंतर तो डॉक्टरांकडे गेला आणि भयानक वेदना होत असल्याचे डॉक्टरांना सांगितले. त्यानंतर डॉक्टरांनी केलेल्या तपासणीसाठी एक्स-रे काढला आणि त्यामधून जे समोर आलं त्यामधून अविश्वसनीय बाब समोर आली. त्यावेळी त्यांनी या रुग्णाच्या पोटाची शस्त्रक्रिया करण्याचं ठरवलं. डॉक्टरांनी या व्यक्तीच्या पोटातील वस्तू बाहेर करण्यासाठी जेव्हा पोटाची शस्त्रक्रिया केली. यावेळी डॉक्टरांनी तब्बल एक किलो लोखंड बाहेर काढलं. यामध्ये नट-बोल्ट, स्क्रु, खिळे आणि चाकू या गोष्टी सापडल्या. या व्यक्तीला लिथुआनियामधील क्लाईपेडा युनिव्हर्सिटी हॉस्पिटलमध्ये दाखल करण्यात आलं होतं.

द गार्डियनने दिलेल्या वृत्तानुसार या व्यक्तीने स्वत: कबूल केलं की आपल्याला लोखंडी वस्तू खायला आवडतात. या व्यक्तीला दारु पिण्याची सवय होती. काही दिवसांपूर्वीच त्याने दारू सोडली होती. मात्र दारुचे व्यसन सोडवताना ही व्यक्ती चक्क लोखंडी वस्तू खायला लागली.