Donald Trump: ट्रम्प यांची विजयी घोडदौड सुरुच; प्रतिस्पर्धी निक्की हेले यांना साऊथ कॅरोलिनात धक्का

वॉशिंग्टन- रिपब्लिकन पक्षाचे अध्यक्षपदाचे उमेदवार आणि माजी राष्ट्राध्यक्ष डोनाल्ड ट्रम्प यांनी विजयी घौडदोड सुरुच ठेवली आहे. त्यांनी प्रतिस्पर्धी उमेदवार निक्की हेले यांचा साऊथ कॅरोलिनामध्ये पराभव केला आहे. विशेष म्हणजे निक्की हेले यांचा साऊथ कॅरोलिना हे 'होम स्टेट' आहे. त्यामुळे हेले यांच्यासाठी हा धक्का मानला जातोय.(Donald Trump decisive victory in the South Carolina Republican primary blitzing rival Nikki Haley)

रिपब्लिकन पक्षाच्या प्रायमरी निवडणुका सुरु आहेत. यात डोनाल्ड ट्रम्प आणि निक्की हेले हे तगडे स्पर्धक मानले जात आहेत. पण, डोनाल्ड ट्रम्प एक-एक पाऊल पुढे जात आहेत. अशीच परिस्थिती राहिल्यास रिपब्लिकन पक्षाकडून अध्यक्षपदाचे उमेदवार डोनाल्ड ट्रम्पच नक्की असतील. त्यामुळे त्यांची अध्यक्षपदासाठी थेट जो बायडेन यांच्याशी लढत होईल.

डोनाल्ड ट्रम्प यांनी आतापर्यंत चार राज्यांमध्ये विजय मिळवला आहे. प्रत्येक विजयानंतर डोनाल्ड ट्रम्प अधिक आक्रमक होत आहेत. दुसरीकडे निक्की हेले यांनी ७७ वर्षीय डोनाल्ड ट्रम्प यांच्या मानसिक तंदुरुस्तीबाबत प्रश्न उपस्थित केले आहेत. तसेच दुसऱ्या वेळेस ट्रम्प निवडून आल्यास देशात अनागोंदी निर्माण होईल असं त्या म्हणाल्याआहेत.

२०१० मध्ये निक्की हेले या साऊथ कॅरोलिनाच्या प्रसिद्ध मेअर होत्या. त्या एकमेव महिला उमेदवार रिपब्लिकन पक्षाकडून लढत आहेत. पण, त्यांना 'अमेरिका फस्ट' अजेंडा चालवणाऱ्या डोनाल्ड ट्रम्प यांचा पराभव करणे अवघड जात आहे. ट्रम्प यांच्यावर अनेक खटले भरण्यात आलेले आहेत. तरी उजव्या विजारसरणीच्या लोकांचा त्यांनाच पाठिंबा असल्याचं दिसत आहे.

अमेरिकेमध्ये नोव्हेंबरमध्ये अध्यक्षपदाच्या निवडणुका होणार आहेत. त्यासाठी डेमोक्रेटिक पक्षाचे अध्यक्षपदाचे उमेदवार जो बायडेन यांनी कंबर कसली आहे. पण, त्यांच्या वाढलेल्या वयाची अमेरिकेत चर्चा सुरु आहे. असे असले तरी अध्यक्षपदासाठी डोनाल्ड ट्रम्प आणि जो बायडेन यांच्यातच लढत होण्याची शक्यता आहे. (Latest Marathi News)