पोलंड, बल्गेरियाचा गॅसपुरवठा बंद

मॉस्को : रशियाचे चलन असलेल्या रुबलमध्येच मूल्य चुकविण्यास नकार दिल्याबद्दल नैसर्गिक वायूचा पुरवठा करणाऱ्या ‘गॅझप्रोम’ या रशियाच्या सरकारी कंपनीने पोलंड आणि बल्गेरिया या दोन देशांचा नैसर्गिक वायूचा पुरवठा खंडित केला आहे. रशिया-युक्रेन युद्धात युक्रेनला सक्रीय पाठिंबा दिल्याबद्दल रशियाने त्यांच्याविरोधात उघडलेली ही युद्धआघाडीच आहे, असे मानले जात आहे.

युरोपमध्ये नैसर्गिक वायूचा पुरवठा केल्याचा परतावा डॉलर अथवा युरोमध्ये न स्वीकारता रुबल या रशियाच्या चलनामध्येच स्वीकारण्याचे आदेश रशियाचे अध्यक्ष व्लादीमिर पुतीन यांनी कंपन्यांना दिले आहेत. युरोपमधील अनेक देशांनी याला विरोध केला आहे. त्यामुळे रशियाने आज पोलंड आणि बल्गेरिया या दोन देशांचा वायू पुरवठा बंद करण्याचा निर्णय घेतला आहे. या दोन्ही देशांनी एक एप्रिलनंतर खरेदी केलेल्या नैसर्गिक वायूबद्दल रशियाला पैसे दिलेले नाहीत. इतर युरोपीय देशांचाही वायू पुरवठा बंद करण्याचा इशाराही ‘गॅझप्रोम’ने दिला आहे.

‘गॅझप्रोम’च्या या निर्णयानंतर युरोपमधील नैसर्गिक वायूच्या दरांत २४ टक्क्यांनी वाढ झाली आहे. पोलंडने युक्रेनमधील अनेक नागरिकांना आश्रय दिला असून त्यांनी मोठ्या प्रमाणावर युद्धसाहित्यही पुरविले आहे. बल्गेरियाला ९० टक्के वायू पुरवठा रशियाकडूनच होतो.

युरोपमधील विविध देशांच्या ऊर्जा संस्थांनी रशियाच्या या निर्णयावर टीका केली आहे. दोन देशांमध्ये झालेल्या कराराशी राजकारणाचा संबंध जोडला जात असून यामुळे ऊर्जेसाठी रशियावर कमीत कमी अवलंबून राहण्याच्या आमच्या प्रयत्नांना बळच मिळत आहे, असे पॅरिसमधील आंतरराष्ट्रीय ऊर्जा संस्थेने म्हटले आहे.

युद्धाच्या आघाडीवर

• युद्धात वापर होऊ नये म्हणून चीनमधील डीजेआय टेक्नॉलॉजी ड्रोन विक्रेत्या कंपनीकडून रशिया आणि युक्रेनमधील व्यवहार स्थगित.

• युक्रेनच्या पूर्व भागातून बाहेर जाण्यासाठी रेल्वेस्थानकांवर नागरिकांची गर्दी

• मोल्दोवा येथे बाँबस्फोटांत दोन रेडिओ टॉवर उद्ध्वस्त

• रोमानिया-युक्रेन यांना जोडणारा रेल्वेपूल क्षेपणास्त्र हल्ल्यात उद्ध्वस्त

• युद्धाचा वेग गाठत मदत करा

वॉशिंग्टन : युक्रेनमधील युद्ध ज्या वेगाने पसरत आहे, तो वेग गाठत युक्रेनला शस्त्रांची आणि इतर साहित्याची मदत करावी. युक्रेनच्या पूर्व भागात रशिया अविरत बाँबवर्षाव करत असून हे युद्ध युक्रेनच्या सीमा ओलांडून इतर देशांमध्येही विस्तारू शकते, असे अमेरिकेचे संरक्षण मंत्री लॉइड ऑस्टिन यांनी मित्र देशांना उद्देशून सांगितेल.