German war criminals: 99 वर्षांच्या महिलेला तुरुंगातून सोडण्यास कोर्टाने का दिला नकार? थेट होता हिटलरने केलेल्या हत्यांशी संबंध

बर्लिन, ता. २० (पीटीआय) : जर्मनीतील न्यायालयाने ९९ वर्षांच्या एका कैदी महिलेने तुरुंगातून सोडून देण्याची विनंती करणारी केलेली याचिका फेटाळून लावली आहे. दुसऱ्या महायुद्ध काळात सुमारे १० हजार जणांच्या हत्येला नाझी सैन्यातील एका वरिष्ठ अधिकाऱ्याची सचिव म्हणून ती कारणीभूत असल्याचे ठरवून तिला शिक्षा झालेली आहे. (German war criminals)

इर्मगार्ड फर्शनर असे या महिलेचे नाव असून ती नाझी सैन्यातील एका अधिकाऱ्याची सचिव म्हणून स्टथॉफ येथील (सध्या पोलंडमध्ये) छळछावणीत काम करत होती. या छावणीत १०,५०५ जणांना ठार मारण्यात आले होते. या हत्याकांडातील एक भागीदार म्हणून फर्शनर यांना दोषी ठरवून शिक्षा झालेली आहे.

मागील महिन्यात त्यांनी याचिका करत शिक्षेतून मुक्त करण्याची विनंती केली होती. त्याकाळात फर्शनर यांच्या वरिष्ठांच्या सूचनेनुसार झालेल्या हत्याकांडात त्या खरोखरच किती साह्यकारी ठरल्या आणि त्यांना छळछावणीत घडणाऱ्या प्रकारांची तरी त्यांना माहिती होती का, याबाबत शंका आहेत, असा युक्तिवाद त्यांच्या वकीलांनी केला होता.

मात्र, जून १९४३ ते एप्रिल १९४५ या काळात वरिष्ठ अधिकाऱ्यांची सचिव आणि स्टेनोग्राफर म्हणून काम करत असलेल्या फर्शनर यांना छळछावणीत डांबलेल्या कैद्यांना गॅसचेंबरमध्ये घालून निघृणपणे मारले जात असल्याची पूर्ण कल्पना होती, असे न्यायालयाने स्पष्ट करत याचिका फेटाळून लावली.