Ebrahim Raisi: इराणच्या अध्यक्षांना घेऊन जाणाऱ्या हेलिकॉप्टरचा अझरबैजानमध्ये अपघात, बचावपथक रवाना

नवी दिल्ली- इराणचे अध्यक्ष इब्राहिम रईसी यांना घेऊन जाणाऱ्या हेलिकॉप्टरची हार्ड लँडिग झाल्याचे वृत्त आहे. बचावपथक मदतीसाठी पाठवण्यात आल्याची माहिती आहे. अपघातात नेमकं काय झालंय याची माहिती देण्यात आलेली नाही. फक्त, हेलिकॉप्टरचा अपघात झाल्याचा रिपोर्ट अनेक स्थानिक माध्यमांनी दिला आहे. (Iranian president Ebrahim Raisi )

रिपोर्टनुसार, हेलिकॉप्टरमध्ये देशाचे अर्थमंत्री अमीर अबोल्लाहीन हे देखील अध्यक्षांसोबत उपस्थित होते. अध्यक्ष रईसी यांच्या ताफ्यामध्ये एकूण तीन हेलिकॉप्टर होते. यातील दोन हेलिकॉप्टर नियोजित स्थळी पोहोचले आहेत. पण, तिसऱ्या हेलिकॉप्टरचा अपघात झाला आहे. सूचना मिळताच बचावपथक घटनास्थळी रवाना झाले आहे.

मंत्री अहमद वाहिदी यांनी टीव्हीला दिलेल्या मुलाखतीत सांगितलं की, 'यासंदर्भात अधिक अपडेल अद्याप मिळालेले नाहीत.' ६३ वर्षीय रईसी हे २००१ मध्ये दुसऱ्यांदा देशाचे अध्यक्ष झाले आहेत. ते सत्तेत आल्यापासून नीतिमत्ता कायदे अधिक कठोर झाल्याचं पाहायला मिळतं. तसेच सरकारविरोधातील आंदोलने कठोरपणे चिरडण्यात आले आहेत. याशिवाय त्यांनी अणुबॉम्बबाबत जगातील देशांसोबत चर्चा सुरु केली आहे. अयातुल्ला खोमेनी यांचा उत्तराधिकारी म्हणून त्यांना पाहिलं जातं

इराण मिडियाच्या माहितीनुसार, अध्यक्ष रईसी हे एका धरणाचे उद्घाटन करून परतत होते. त्यावेळी त्यांना हेलिकॉप्टरमध्ये निर्माण झालेल्या समस्येमुळे हार्ड लँडिग करावी लागली. त्यांचे ठिकाण कळू शकलेलं नाही. यासाठी एक पथक रवाना करण्यात आलं आहे. ड्रोन्सची देखील मदत घेतली जात आहे. हेलिकॉप्टरमध्ये अन्य काही मंत्री होते असं सांगितलं जातं.