भारतीय अधिकाऱ्यांचा गट तालिबानी नेत्यांच्या भेटीला; 'या' विषयावर चर्चा

तालिबाननं अफगाणिस्तानचा ताबा घेतल्यानंतर पहिल्यांदाच भारत सध्या अफगाणिस्तान दौऱ्यावर आहे. परराष्ट्र मंत्रालयातल्या काही वरिष्ठ अधिकाऱ्यांचा गट सध्या काबूल दौऱ्यावर गेला आहे. या दौऱ्यामध्ये हा गट तालिबानच्या काही प्रमुख सदस्यांची भेट घेणार आहे. (Indian team on Kabul visit, Discussion with Taliban)

या दौऱ्यात अफगाणिस्तानच्या लोकांना मानवतावादी सहकार्य देण्याबद्दल भारताच्या वतीने चर्चा होणार असल्याची माहिती परराष्ट्र मंत्रालयाने दिली आहे. अफगाणिस्तानला मानवतावादी सहाय्य पुरवण्याविषयी देखरेख करणं हा या चर्चेचा उद्देश असणार आहे. अशी मदत पुरवणाऱ्या आंतरराष्ट्रीय प्रतिनिधींनाही अधिकाऱ्यांचा हा गट भेटणार आहे. भारतातर्फे जिथे प्रकल्प सुरू आहेत, तिथेही हा गट भेट देणार आहे.

पाकिस्तान, अफगाणिस्तान आणि इराणचे संयुक्त मुख्य सचिव जे. पी. सिंग हे या गटाचं नेतृत्व करत आहेत. ते यापूर्वीही तालिबानच्या अधिकाऱ्यांना भेटलेले आहेत. या आधीही अफगाणिस्तानातल्या लोकांना मानवतावादी सहाय्य पुरवण्याच्या मोहिमे अंतर्गत भारताने २०,००० मेट्रिक टन गहू, १३ टन औषधं, कोरोना प्रतिबंधक लसीचे ५ लाख डोस आणि थंडीपासून वाचण्यासाठी कपडे पुरवण्यात आले आहेत. हे साहित्य काबूलमधल्या इंदिरा गांधी बालरुग्णालयाकडे देण्यात आलं आहेत. भारत आणखी औषधं आणि धान्याचा पुरवठा अफगाणिस्तानला करणार असल्याची माहिती परराष्ट्र मंत्रालयाने दिली.