पहिली लस नव्वदीतील आजींना; ब्रिटनमध्ये लसीकरणास सुरुवात

लंडन - कोरोना प्रतिबंधासाठी जगातील पहिली लसीकरण मोहिम ब्रिटनमध्ये आज सुरु झाली. मार्गारेट किनन या नव्वद वर्षांच्या आजी लस टोचवून घेणाऱ्या जगातील पहिल्या व्यक्ती ठरल्या आहेत. ब्रिटनने फायझर कंपनीच्या लशीला मंजुरी दिली आहे. 

जगभरातील इतर बातम्या वाचण्यासाठी येथे क्लिक करा

ब्रिटनमधील ही आतापर्यंतची सर्वांत मोठी लसीकरण मोहिम आहे. आज सकाळी साडे सहालाच मार्गारेट किनन यांना स्थानिक रुग्णालयात लसीचा डोस देण्यात आला. हा ऐतिहासीक क्षण असल्याचे ब्रिटनच्या नॅशनल हेल्थ सर्व्हीसने (एनएचएस) म्हटले आहे. मार्गारेट यांचा पुढील आठवड्यात ९१ वा वाढदिवस आहे. ‘लस टोचवून घेतलेली पहिली व्यक्ती ठरल्याबद्दल मला आनंद होत आहे. माझ्या वाढदिवसाची ही भेटवस्तूच आहे. माझ्या कुटुंबाबरोबर नाताळसह आणखी काही महत्त्वाचे क्षण साजरे करण्याबाबत मला आता विश्‍वास वाटत आहे,’ अशी प्रतिक्रिया त्यांनी लस घेतल्यानंतर दिली. त्यांना २१ दिवसांनंतर लसीचा दुसरा डोस दिला जाणार आहे. एका ज्वेलरीच्या दुकानात त्या वयाच्या ८७ व्या वर्षापर्यंत काम करत होत्या. आपल्या मुला-सुना-नातवंडांबरोबर पुन्हा एकदा लवकरच बाहेर फिरायला जाण्याची त्यांची इच्छा आहे. इतरांनीही लस टोचवून घ्यावी, असा सल्ला त्यांनी दिला आहे. 

देशभरातील इतर बातम्या वाचण्यासाठी येथे क्लिक करा

‘एनएचएस’ने ब्रिटनमधील संसर्गाचा सर्वाधिक धोका असलेल्या व्यक्तींची यादी आधीपासूनच तयार ठेवली होती आणि लस देताना त्यांनाच प्राधान्य दिले आहे. ८० च्या पुढे वय असलेले ज्येष्ठ नागरिक आणि आरोग्य सेवकांना आधी लस दिली जाणार आहे. या यादीत नऊ नातवंडाचे आजोबा असलेल्या हरी शुक्ला (वय ८७) या भारतीय वंशाच्या व्यक्तीचाही समावेश आहे. त्यांनाही आज सकाळी लसीचा डोस देण्यात आला. 

ताज्या बातम्यांसाठी डाऊनलोड करा ई-सकाळचे ऍप

पुण्याच्या बातम्या वाचण्यासाठी येथे ► क्लिक करा