पृथ्वीला सर्वोत्तम बनविण्यावर मोदींची चर्चा

रोम : पंतप्रधान नरेंद्र मोदी यांनी शुक्रवारी युरोपिय परिषदेचे अध्यक्ष चार्ल्स मिशेल आणि युरोपीय आयोगाच्या अध्यक्षा उर्सुला वोन डेर लेयेन यांच्यासह संयुक्त बैठकीत भाग घेतला. पृथ्वीला सर्वोत्तम बनविण्यासाठी आर्थिक व लोकांमधील परस्पर नाते मजबूत करण्याच्या उपायांवर चर्चा झाली.

‘जी२०’ शिखर परिषदेत भाग घेण्यासाठी मोदी आज इटलीला पोहचले. त्यानंतरची ही त्यांची पहिली अधिकृत बैठक होती. कोरोनाच्या साथीतून जागतिक अर्थव्यवस्था व आरोग्य सेवा पुन्हा सुरळीत करणे व शाश्‍वत विकास व हवामान बदल या विषयांवर ते इतर जागतिक नेत्यांबरोबर चर्चा करणार आहेत. चार्ल्स मिशेल व उर्सुला वोन डेर लेयेन यांच्याशी सकारात्मक चर्चेने रोममधील अधिकृत कार्यक्रमांना सुरुवात झाली, असे ट्विट पंतप्रधांनी केले. भारत-युरोपिय संघातील द्विपक्षीय संबंधांना१९६०पासूनच सुरुवात झाली होती. युरोपिय समुदायाबरोबर १९६२ मध्ये राजनैतिक संबंध स्थापन करणाऱ्या देशांपैकी एक भारत होता. भारत व युरोपिय समुदायात पहिली शिखर परिषद २८ जून २००० रोजी लिस्बन येथे झाली होती. दोघांच्या संबंधांतील विकासाच्या दृष्टिने ही ऐतिहासिक घटना होती. हेग येथे २००४मध्ये झालेल्या पाचव्या शिखर परिषदेपर्यंत भारत व युरोपिय समुदायातील संबंध सामरिक भागीदारीपर्यंत पोचली.