जीव वाचवण्यासाठी १० लाख नागरिकांनी युक्रेन सोडलं; संयुक्त राष्ट्राची माहिती

गेल्या ११ दिवसांपासून रशिया आणि युक्रेन यांच्यात युद्ध सुरु आहे. युक्रेनवर हल्ले सुरु केल्यानंतर रशियावर अनेक देशांकडून निर्बंध लागू केले जात आहेत. यातच रशियाने शनिवारी तात्पुरत्या युद्धबंदीची घोषणा केली. रशियाच्या हल्ल्यात युक्रेनमध्ये असंख्य नागरिकांचा मृत्यू झाला आहे. नाटोने जेव्हा नो फ्लाय झोन घोषित कऱण्यास नकार दिला तेव्हा युक्रेनच्या राष्ट्रपतींनी संताप व्यक्त केला होता. रशियाने युक्रेनमधील अनेक शहरे ताब्यात घेतली असून त्यात खेरसन आणि मारियुपोलचा समावेश आहे.

युक्रेनमध्ये अडकलेल्या नागरिकांना बाहेर काढण्यासाठी भारताचे युद्ध पातळीवर प्रयत्न सुरु आहेत. आतापर्यंत २० हजारांहून अधिक भारतीय नागरिकांना ऑपरेशन गंगा अंतर्गत मायदेशी आणण्यात आलं आहे. आता ऑपरेशन गंगा शेवटच्या टप्प्यात सुरु असल्याची माहिती भारताच्या परराष्ट्र मंत्रालयाने दिली आहे. तर आतापर्यंत युक्रेनमधून जवळपास १० लाख नागरिक सुरक्षेच्या कारणास्तव बाहेर पडल्याचं संयुक्त राष्ट्राने म्हटलं आहे.

युद्धाचं संकट असताना आपला जीव वाचवण्यासाठी युक्रेनमधून १० लाखांहून अधिक नागरिकांनी इतर देशांमध्ये जाण्याचा निर्णय घेतला. पश्चिम सीमेला लागून असलेल्या देशांमध्ये युक्रेनचे नागरिक जात आहेत. यामध्ये महिला, वृद्ध आणि मुलांचा समावेश सर्वाधिक असल्याचं संयुक्त राष्ट्राने सांगितलं आहे.

रशियाकडून केल्या जाणाऱ्या हल्ल्याला युक्रेनकडूनसुद्धा प्रत्युत्तर दिलं जात आहे. यात युक्रेनने असा दावा केला आहे की, त्यांनी रशियाचे ११ हजार सैनिक ठार केले आहेत. तर रशियाचा असा दावा आहे की, युक्रेनची ६८ रडार स्टेशन उद्ध्वस्त करण्यात आली अशून युक्रेनमधील गॅस ट्रान्समिशन नेटवर्कसुद्ध ठप्प झालं आहे.