Muhammad Yunus : भारताच्या भूमिकेने दुःख झाले : युनूस

ढाका : बांगलादेशमध्ये सरकारी नोकऱ्यांमधील आरक्षण रद्द करण्याच्या विद्यार्थ्यांच्या हिंसक आंदोलनाचा भडका उडाला असून याबाबत भारताच्या भूमिकेबाबत येथील अर्थशास्त्रज्ञ व नोबेल पुरस्कार विजेते महंमद युनूस यांनी नाराजी व्यक्त केली. हे आंदोलन शेजारील देशांमध्ये पसरेल, अशा इशाराही त्यांनी दिला आहे.

एका इंग्रजी वृत्तपत्राशी बोलताना ते म्हणाले, ‘‘हे आंदोलन बांगलादेशची अंतर्गत बाब आहे, असे भारताने म्हटल्याने मला खूप दुःख झाले. समजा भावाच्या घरात आग लागली तर मी कसे म्हणू शकेन की ती त्याचा अंतर्गत बाब आहे. मुत्सद्देगिरीत ‘त्यांची ही अंतर्गत बाब आहे,’ असे म्हणण्यापेक्षा अधिक समृद्ध शब्दसंग्रह आहे.’’ बांगलादेशात १७ कोटी लोक संघर्ष करीत आहेत. युवकांच्या हत्या होत आहेत. कायदा- सुव्यवस्था ढासळत आहे. ही अशांतता केवळ बांगलादेशपुरतीच मर्यादित न राहता, शेजारील देशांमध्येही हे लोण पसरेल हे निश्‍चित, असा इशारा त्यांनी दिला.

‘लोकशाही व्यवस्थेला पाठिंबा द्या’

बांगलादेशमधील लोकशाही व्यवस्थेला भारताने पाठिंबा द्यावा आणि निवडणुकीतील अपारदर्शकतेवर टीका करावी, असे आवाहन युनूस यांनी केले. भारतात नियमित आणि यशस्वीपणे होणाऱ्या निवडणुकांचे त्यांनी कौतुक केले. तसेच बांगलादेशच्या लोकशाही उद्दिष्टांना भारताकडून समर्थम मिळत नसल्याची खंत त्यांनी व्यक्त केली. या मुद्द्यावर भारत सरकारशी चर्चा करणार असल्याचे ते म्हणाले.