म्यानमार : ३० जणांची हत्या, मृतदेह जाळले; मुलं-महिलांचा समावेश

म्यानमारमध्ये (Myanmar) सत्तापालट झाल्यानंतर आता लष्कराकडून हिंसाचार सुरु आहे. लोकांची निर्दयीपणे हत्या केली जात आहे. यात मुलं, वृद्धांसह महिलांचाही समावेश आहे. लष्करी बळाच्या मदतीने आधी एका गावातील लोकांना ताब्यात घेण्यात आलं होतं. त्यानंतर जवळपास ३० लोकांची गोळी मारून हत्या करण्यात आली आणि मृतदेहांना आग लावण्यात आली. मृतांमध्ये लहान मुलं आणि महिलांचासुद्धा समावेश आहे.

प्रत्यक्षदर्शी आणि काही माध्यमांनी दिलेल्या बातम्यांमधून याबाबतची माहिती समोर आली आहे. म्यानमारच्या हप्रुसो शहारापासून जवळ असलेल्या मो सो या गावात हत्याकांड झाल्याचं सांगितलं जातंय. या घटनेचे फोटो आता सोशल मीडियावर व्हायरल होत आहेत. यामुळे आता सत्तेत असलेल्या लष्कराविरोधात लोकांमध्ये संतापाची लाट उसळली आहे. मो सो गावात लष्कराच्या हल्ल्यापासून वाचण्यासाठी शरणार्थी लपून बसले होते असं तिथल्या स्थानिक माध्यमांनी म्हटलं आहे. तर म्यानमारच्या लष्कराने शस्त्रास्त्रासह असलेल्या अनेक दहशतवाद्यांना ठार केल्याचं म्हटलं आहे.

व्हायरल होत असलेल्या फोटोंमध्ये तीन वाहनांमध्ये मृतदेह जळत असल्याचं दिसतं. फोटो इतके भयंकर आहेत की त्यात अर्धवट जळालेले मृतदेह, आजुबाजुची भयावह परिस्थिती दिसत आहे. एका प्रत्यक्षदर्शीने सांगितले की, कोइ नागान गावात सशस्त्र विरोधी दल आणि म्यानमानरच्या लष्करातील संघर्षापासून वाचण्यासाठी लोक शुक्रवारी पळाले होते. लष्कराने त्यांना ताब्यात घेतल्यानंतर काही वेळातच गोळ्या घालून हत्या केली. शरणार्थी शिबिराकडे जात असताना लष्कराने लोकांना ताब्यात घेतल्याचा दावा प्रत्यक्षदर्शीने केला आहे.

म्यानमारमध्ये १ फेब्रुवारीपासून परिस्थिती बिघडली. लोकांनी निवडलेल्या सरकारला बरखास्त करून लष्कराने देशावर ताबा मिळवला होता. तेव्हापासून देशात हिंसाचाराच्या घटना वाढत आहेत. लोक रस्त्यावर उतरल्यास त्यांच्यावर गोळीबार केला जात आहे. अद्याप देशातील काही भागात लोक लष्कराविरोधात आंदोलन करत आहेत.