काटमांडू- नेपाळच्या कामी रीटा शेर्पाने रविवारी सकाळी पराक्रम केला आहे. त्यांनी २९ वेळा जगातील सर्वात उंच शिखर माऊंट एव्हरेस्ट सर करण्याचा विक्रम केला आहे. विशेष म्हणजे त्यांनी स्वत:चाच विक्रम मोडीत काढला आहे. याआधी त्यांनी २८ वेळा माऊंट एव्हरेस्ट सर केला आहे. एएनआयने यासंदर्भातील वृत्त दिलं आहे.
कामी रीटा यांना एव्हरेस्ट मॅन म्हणून देखील ओळखलं जातं. ५४ वर्षीय शेर्पा आणि गाईड असलेल्या कामी रीटा यांनी मागील वर्षी वसंत ऋतूमध्ये माऊंट एव्हरेस्ट दोनवेळा सर केलं होतं. अठ्ठावीसव्यांदा त्यांनी हा पराक्रम केला होता. त्यांनी आपलाच विक्रम मोडण्याचे सुतोवाच त्यावेळी केले होते. माऊंट एव्हरेस्टची उंची ८८४८.८६ मीटर आहे. तो जगातील सर्वात उंच शिखर आहे.
कामी रीटा हे नेपाळचे शेर्पा असून माऊंट एव्हरेस्ट २९ वेळा सर करणारे ते जगातील एकमेव व्यक्ती आहेत. माऊंट एव्हरेस्टला नेपाळमध्ये सागरमाथा म्हटलं जातं. शेर्पा कामी रीटा म्हणाले की, 'किती वेळा सागरमाथा सर करायचं याचं काही डोक्यात नाही. जोपर्यंत वाटेल तोपर्यंत सागरमाथा सर करत राहीन.'
पर्यटन विभागाने दिलेल्या माहितीनुसार, शेर्पा कामी रीटा हे सकाळी सात वाजून २५ मिनिटाला शिखरावर पोहोचले होते. ही मोहीम 'सेव्हन समिट ट्रेक्स'कडून आयोजित करण्यात आली होती. या कामगिरीनंतर कामी रीटा यांचे जगभरातून कौतुक होत आहे. माऊंट एव्हरेस्ट सर करणे ही मोठी आव्हानाची गोष्ट आहे. अनेक जणांना माऊंट एव्हरेस्ट सर करण्याच्या नादात जीव गमवावा लागला आहे.
मिळालेल्या माहितीनुसार, कामी रीटा हे मे महिन्याच्या सुरुवातीला काटमांडू येथून २८ गिर्यारोहकांसोबत माऊंट एव्हरेस्ट सर करण्यासाठी निघाले होते. ते गाईड म्हणून काम करत होते. यापूर्वी पासांग देवा शेर्पा यांनी सागरमाथा २७ वेळा सर केला आहे. ते पुन्हा सागरमाथा सर करणार आहेत का, याबाबत कोणतीही माहिती नाही.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
