लष्करानं देशाच्या पंतप्रधानांनाच नेलं पळवून

खारतूम : उत्तर आफ्रिकेतील (North Africa) सुडान (Sudan) देशात राजकीय आणि आर्थिक संकट गडद होत चाललंय. सरकारच्या निर्णयामुळं संतप्त नागरिक रस्त्यावर उतरून आंदोलन करताना दिसताहेत. लोकांनी सैन्याकडं (Military) बंडाचं आवाहन केलं होतं. दरम्यान, सुडानचे पंतप्रधान अब्दुल्ला हमदोक (PM Abdalla Hamdok) यांना सुरक्षा दलाच्या पथकानं ताब्यात घेतलं आहे. 'रॉयटर्स'च्या माहितीनुसार, सुरक्षा दलानं पंतप्रधान, तसेच काही पाच वरिष्ठ अधिकाऱ्यांना ताब्यात घेतलंय. या सर्वांना अज्ञातस्थळी नेण्यात आल्याचंही समजतंय.

रॉयटर्सनं दिलेल्या माहितीनुसार, देशाच्या माहिती मंत्रालयानं पंतप्रधान अब्दुल्ला हमदोक यांना सोमवारी सशस्त्र दलांनी ताब्यात घेतल्याची माहिती दिली. मंत्रालयानं एका निेवेदनात म्हटलंय, की जेव्हा हमदोक यांनी बंडाचा भाग होण्यास नकार दिला, तेव्हा सैन्य दलानं पंतप्रधान हमदोक यांना ताब्यात घेतलं आणि त्यांना अज्ञातस्थळी नेलं. सुडानच्या अधिकाऱ्यांनी सांगितलं, की लष्करी दलानं सोमवारी पाच वरिष्ठ सरकारी अधिकाऱ्यांनाही ताब्यात घेतलंय, तर लोकशाही समर्थक देशाचा मुख्य पक्ष असलेल्या सुडान प्रोफेशनल्स असोसिएशननं जनतेला रस्त्यावर उतरण्याचं आवाहन केलंय. दरम्यान, सुडानमधील अनेक शहरांमध्ये इंटरनेटसेवाही बंद करण्यात आलीय.

दीर्घकाळ सत्ताधारी असलेले हुकूमशहा उमर अल-बशीर यांना सत्तेतून हटवल्यापासून देशात सतत वाद सुरुय. हा वाद लोकशाहीला मारक ठरत असून नागरिक आणि लष्करात खटके उडत आहेत. सुडानमध्ये सप्टेंबरमध्ये सत्तापालटाचा अयशस्वी प्रयत्न झाला. मात्र, हे षडयंत्र कोणी केलं, याची नावं अद्याप उघड झालेली नाहीत. एएफपी या वृत्तसंस्थेशी बोलताना एका सरकारी अधिकाऱ्यानं सांगितलं, की षडयंत्रकर्त्यांनी राज्य मीडिया इमारत ताब्यात घेण्याचा प्रयत्न केला. मात्र, तो अयशस्वी ठरला, असं ते म्हणाले. देशात सर्वाधिक काळ अध्यक्ष असलेले उमर अल-बशीर यांना दोन वर्षांपूर्वी 2019 मध्ये सत्तेवरून हटवण्यात आलं होतं. यानंतर सत्तेचं विभाजन करण्याचा करार झाला होता.