इस्लामाबाद : सहा नाभिकांचे अपहरण करून त्यांची गोळ्या झाडून हत्या केल्याची घटना पाकिस्तानच्या खैबर पख्तुनख्वा प्रांतात आज उघडकीस आली. त्यांचे एक दिवस अगोदर पंजाब प्रांतातून अपहरण करण्यात आले होते.
खैबर पख्तुनख्वा प्रांतातील उत्तर वझिरीस्तान जिल्ह्यातील मीर अली भागात हत्याकांड घडल्याचे पोलिसांनी सांगितले. अपहृत नाभिक हे पंजाब प्रांतातील स्थानिक बाजारात केशकर्तनालय चालवत होते. त्यांचे काल अपहरण करण्यात आले. मात्र ते बेपत्ता झाल्याची माहिती कळाल्यानंतर तपास सुरू असताना रात्री उशिरा त्यांचे मृतदेह आढळून आले. या हत्येची जबाबदारी कोणीही स्वीकारलेली नाही.
या सहा जणांना गोळ्या घालून ठार केल्याचे निष्पन्न झाले आहे. त्यांच्या मारेकऱ्यांचा शोध सुरू केल्याचे पोलिसांनी सांगितले. बान्नू प्रांतीय पोलिस अधिकारी कासीम अली खान म्हणाले, सहा जणांचे मृतदेह मोसाकी भागात आढळून आले.
मृतदेहाची ओळख पटविण्याचे काम सुरू असून त्यापैकी एकाकडे संगणकीय ओळखपत्र सापडले असून तो डेरा गाझी खानचा रहिवासी असल्याचे समजते. काही दिवसांपूर्वीच दहशतवाद्यांनी पाच मजूरांची हत्या केल्याची घटना घडली होती.
ते मजूर तंबूत असताना दहशतवाद्यांनी त्यांच्यावर गोळीबार केला होता. ही घटना ताजी असतानाच आज सकाळी दुसरी घटना उघडकीस आली. दरम्यान, खैबर पख्तुनख्वा प्रांतात दहशतवाद्यांच्या कारवाया वाढल्या असून कायदा आणि सुव्यवस्थेच्या ढासळत्या स्थितीमुळे नागरिकांचे जीवन धोक्यात आले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.