वुहान : चीनमध्ये उद्रेक झालेल्या कोरोना व्हायरसने आता जवळपास निम्म्या जगाला आपल्या कवेत ओढले आहे. भारतातील १४७ नागरिकांना कोरोनाची लागण झाली आहे. आणि हा आकडा वाढत चालला आहे.
चीनमधून कोरोनाने काही अंशी निरोप घेत असल्याच्या पार्श्वभूमीवर संशोधकांनी कोरोनाबाबतचे काही रिपोर्ट प्रसिद्ध केले आहेत. त्यानुसार, ए रक्तगट असलेल्या लोकांना कोरोनाची लागण होण्याचा धोका जास्त असल्याचे म्हटले आहे. तर ओ रक्तगट असलेल्या लोकांना कोरोना होण्याची शक्यता कमी असते, असे या अभ्यासातून निष्पन्न झाले आहे.
कोरोना व्हायरसच्या उद्रेकाचे मूळ ठिकाण असलेल्या चीनमधील वुहान येथील दोन आणि शेनझेन येथील एका हॉस्पिटलमधील कोरोना रुग्णांच्या रिपोर्टचा अभ्यास करण्यात आला. कोरोनाग्रस्त असलेल्या २१७३ रुग्णांच्या नमुने तपासण्यात आले. तसेच वुहानमधील ३६९४ संशयित रुग्णांची कोविड-१ ची चाचणी घेण्यात आली.
संशोधकांनी केलेल्या अभ्यासानुसार, वुहानमधील चाचणी करण्यात आलेल्या लोकांमधील ३२.१६ टक्के लोक हे ए रक्तगट असलेले होते. बी रक्तगट असणारे २४.९० तर एबी रक्तगट असणारे ९.१० टक्के लोक होते. ओ रक्तगट असलेल्या नागरिकांचे प्रमाण तब्बल ३३.८४ एवढे होते. वुहानमध्ये सर्वात जास्त नागरिक हे ए आणि ओ रक्तगट असणारे आहेत.
तसेच, वुहानच्या दुसऱ्या हॉस्पिटलमधील १७७५ रुग्णांच्या रिपोर्टचा अभ्यास करण्यात आला. त्यामध्ये ३७.७५ टक्के लोक हे ए रक्तगट असणारे होते. तर ९.१० टक्के लोक हे ओ रक्तगट असणारे होते. यावरून असे दिसून येते की, ए रक्तगट असलेल्या रुग्णांची संख्या जास्त असून ओ रक्तगट असलेल्या रुग्णांची संख्या कमी आहे. तर कोरोनामुळे मृत्यू पावलेल्या २०६ रुग्णांपैकी ४१.२६ टक्के रुग्ण हे ए रक्तगट असणारे होते. तर ओ रक्तगट असलेल्या २५ टक्के रुग्णांचा कोरोनामुळे मृत्यू झाला आहे.
सर्व ठिकाणचे रिपोर्ट पाहिल्यानंतर त्यामध्ये ए रक्तगट असणारे लोकच कोरोनाचे जास्त बळी ठरल्याचे दिसून आले. तर ओ रक्तगट असलेल्या रुग्णांची संख्या सर्वात कमी होती. त्यामुळे ए रक्तगट असलेल्या लोकांनी कोरोना होऊ नये यासाठी जास्त खबरदारी घेतली पाहिजे, असे संशोधकांचे म्हणणे असल्याचे न्यूयॉर्क पोस्टने आपल्या वृत्तामध्ये म्हटले आहे.
"जर तुमचा ए रक्तगट असेल, तर घाबरून जाण्याचे कारण नाही. कारण ए रक्तगट असलेल्या लोकांनाच कोरोना होतो असेही नाही. आणि ओ रक्तगट असणाऱ्यांना कोरोना होत नाही, ते पूर्णपणे सुरक्षित आहेत, असेही नाही. जर तुमची प्रतिकारशक्ती चांगली असेल, आणि तुम्ही वारंवार हात धुवत असाल, स्वच्छता राखत असाल, तर कोरोनाला घाबरण्याची गरज नाही. मात्र, या सर्व गोष्टींचे पालन केले पाहिजे. याबाबतचे अधिक संशोधन अजूनही सुरू आहे, असे गावो यिंगदाई यांनी म्हटले आहे.
जगभरातील सुमारे १,९६,००० लोकांना कोरोनाची लागण झाल्याची प्राथमिक माहिती मिळत आहे. त्यापैकी आतापर्यंत ७८०० लोकांचा कोरोनामुळे मृत्यू झाला आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.