वॉशिंग्टनमध्ये भारतीय दूतावासाबाहेर आंदोलन करण्याचा खलिस्तानी समर्थकांचा डाव, दूतावासाबाहेर कडक सुरक्षा

Indian Embassy in USA:वॉशिंग्टनमधील भारतीय दूतावासाच्या बाहेर खलिस्तान समर्थक निदर्शने करण्याची योजना उघड झाली आहे. या पार्श्वभूमीवर अमेरिकेतील भारतीय दूतावासाबाहेर सुरक्षा वाढवण्यात आली आहे. भारत नेहमीच अशा घटनांचा निषेध करत आलाय आणि संबंधित सरकारने या गैरकृत्यांवर कठोर कारवाई करण्याची मागणी केली आहे.

यापूर्वी 4 जुलै रोजी सॅन फ्रान्सिस्कोमधील वाणिज्य दूतावास खलिस्तान समर्थकांनी पेटवून दिला होता. मात्र, अग्निशमन दलाच्या तत्परतेमुळे आग तातडीने आटोक्यात आणण्यात आली आणि कोणतीही जीवितहानी झाली नाही. खलिस्तानी कट्टरवाद्यांनी या घटनेचा व्हिडिओही बनवून सोशल मीडियावर व्हायरल केला होता. अमेरिकेने या घटनेचा तीव्र शब्दात निषेध केला असून कारवाई करण्याचे आश्वासन दिले आहे.

यापूर्वी देखील करण्यात आले आहेत हल्ले-

काही महिन्यांपूर्वी सॅन फ्रान्सिस्कोमधील भारतीय वाणिज्य दूतावासावर खलिस्तान समर्थकांनी हल्ला केला होता. यावेळी खलिस्तान समर्थक घोषणा देण्यात आल्या आणि आंदोलकांनी सुरक्षा अडथळे तोडून वाणिज्य दूतावासाच्या आवारात खलिस्तानी झेंडे लावले.(Latest Marathi News)

यापूर्वी लंडनमधील भारतीय दूतावासावरही खलिस्तान समर्थकांनी हल्ला केला होता. खलिस्तानी नेता हरदीपसिंग निज्जरच्या कॅनडात हत्येनंतर भारतीय दूतावासाला लक्ष्य करण्याच्या घटनांमध्ये वाढ झाली आहे.

एनआयए अनेक प्रकरणांचा तपास करत आहे

अमेरिका आणि कॅनडातील भारतीय दूतावासांवर झालेल्या हल्ल्यांची राष्ट्रीय तपास यंत्रणा चौकशी करत आहे. मार्चमध्ये खलिस्तान समर्थकांनी दोन्ही देशांतील भारतीय दूतावासावर हल्ले केले होते. याशिवाय ब्रिटनमधील भारतीय उच्चायुक्तालयात हिंसक निदर्शने आणि तोडफोडीचे प्रयत्न करण्यात आले होते, त्याचीही चौकशी एनआयए करत आहे.(Latest Marathi News)