रशियाचे राष्ट्रपती पुतीन विलगीकरणात; डझनभर निकटवर्तीयांना 'कोरोना'

मॉस्को : रशियाचे राष्ट्रपती व्लादिमीर पुतीन (Russian President Vladimir Putin) हे विलगीकरणात गेले आहेत. पुतीन यांच्या निकटवर्तीयांना कोरोनाची (Coronavirus) बाधा झाली आहे. त्यानंतर पुतीन यांनी विलगीकरणात राहण्याचा निर्णय घेतलाय. पुतीन यांना कोरोनाचा संसर्ग होऊ नये, यासाठी विशेष काळजी घेण्यात येत आहे. तज्ज्ञ डॉक्टरांचे एक पथक पुतीन यांच्या प्रकृतीवर देखरेख ठेवत असल्याचेही समजते.

तर, पुतीन यांना भेटणाऱ्या व्यक्तींना विलगीकरणात ठेवण्यात येत आहे. विलगीकरणाचा कालावधी पूर्ण करणाऱ्यांनाच पुतीन यांची भेट घेता येत होती. एवढी काळजी घेतल्यानंतरही पुतीन यांच्या निकटवर्तीयांना कोरोनाची बाधा झालीय. त्यांच्या संपर्कातील डझनभर अधिकाऱ्यांनाही कोरोनाची लागण झालीय. त्यामुळे या सर्वांची कोरोना चाचणी झाली असून त्यांचा रिपोर्ट पाॅझिटिव्ह आल्याने त्यांना क्वारंटाईन करण्यात आलेय.

मॉस्कोच्या एका बैठकीत पुतीन म्हणाले, की माझ्या संपर्कातील अनेकांना कोरोना झाला असून त्यांना सध्या विलगीकरण कक्षात ठेवण्यात आलीय. यात डझनभर लोकांचा समावेश आहे. राष्ट्रपती कार्यालय 'क्रेमलिन'ने पुतीन यांना मंगळवारी सेल्फ-आयसोलेशनमध्ये जाण्याबाबत माहिती दिली होती. 'क्रेमलिन'चे प्रवक्ते दिमित्री पेसकोव्ह म्हणाले, पुतीन यांनी कोविडची चाचणी जवळच्या मित्राला कोरोनाची लागण झाल्यानंतर केली होती. परंतु, तेव्हा संसर्गाची कोणतीही पुष्टी होऊ शकली नव्हती.

पुतीन यांनी कोविडचे घेतले दोन्ही डोस

पुतीन यांनी कोविड लस स्पुतनिक- V चे दोन्ही डोस घेतले आहेत. त्यांनी एप्रिलमध्ये दुसरा डोस घेतला आहे. त्यांच्या प्रवक्त्याने सांगितले, की राष्ट्रपती पूर्णपणे निरोगी आहेत. परंतु, संक्रमित लोकांच्या संपर्कामुळे ते सध्या आयसोलेशनमध्ये आहेत. पुतीन किती काळ आयसोलेशनमध्ये राहणार याची प्रवक्त्यांना माहिती नाही. मात्र, ते आपले काम सुरू ठेवतील, असे प्रवक्त्याने सांगितलेय.