Hamas-Israel War: 'मला वाटतंय शरद पवार गाझामध्ये सुप्रिया सुळेंना लढण्यासाठी पाठवतील...', भाजप मुख्यमंत्र्याचा खोचक टोला

इस्रायल आणि हमास यांच्यातील युद्ध सुरूच आहे. दरम्यान या युद्धाबाबत भारतीय राजकीय पक्षांची वेगवेगळी मते आहेत. एकीकडे भाजप इस्रायलच्या पाठीशी उभा आहे तर दुसरीकडे विरोधी पक्ष पॅलेस्टाईनच्या पाठीशी आहेत. माजी केंद्रीय मंत्री आणि राष्ट्रवादी काँग्रेसचे अध्यक्ष शरद पवार यांनी देखील पॅलेस्टाईनच्या समर्थनार्थ विधान केलं होते, ज्यावर आसामचे मुख्यमंत्री हिमंता बिस्वा सरमा यांनी प्रतिक्रिया दिली आहे.

आसामचे मुख्यमंत्री हिमंता बिस्वा सरमा याबाबत प्रतिक्रिया देताना म्हणाले की, शरद पवार त्यांची मुलगी सुप्रिया सुळे यांना गाझाला पाठवतील. हिमंता बिस्वा सरमा यांना शरद पवारांनी केलेल्या वक्तव्याबाबत प्रश्न केला असता ते म्हणाले की, 'मला वाटते शरद पवार सुप्रिया मॅडमला हमासला लढण्यासाठी पाठवतील'.

हिमंता बिस्वा यांचे हे वक्तव्य शरद पवार यांच्या वक्तव्यानंतर काही दिवसांनी आले आहे, जेव्हा ते म्हणाले होते की, भारताचे पूर्वीचे पंतप्रधानही पॅलेस्टाईनच्या पाठीशी ठामपणे उभे होते. पंतप्रधान मोदींनी इस्रायलला दिलेला पाठिंबा 'दुर्दैवी' असल्याचे सांगून राष्ट्रवादीचे अध्यक्ष म्हणाले की, त्यांनी खऱ्या मुद्द्याकडे दुर्लक्ष केले.

काय म्हणाले शरद पवार?

"संपूर्ण जमीन पॅलेस्टाईनची आहे आणि इस्रायलने त्यांच्या जमिनीवर कब्जा केला आहे. ती जागा, जमीन आणि घरे, सर्व काही पॅलेस्टाईनच्या मालकीचे होते आणि नंतर इस्रायलने त्यावर कब्जा केला. इस्रायल हा बाहेरचा देश आहे आणि ही जमीन मूळची पॅलेस्टाईनची होती. जे मूळचे इस्रायलचे रहिवासी आहेत त्यांच्या पाठीशी राष्ट्रवादी काँग्रेस उभी असल्याचे ते म्हणाले होते.

पवार यांच्या वक्तव्याचा भाजपने केला होता निषेध

शरद पवारांच्या या वक्तव्याचा भाजपकडूनही निषेध करण्यात आला. मुख्यमंत्री हिमंता यांच्या आधी केंद्रीय मंत्री पीयूष गोयल म्हणाले होते की, शरद पवारांसारखे ज्येष्ठ नेते इस्रायलमधील दहशतवादी हल्ल्याबाबत भारताच्या भूमिकेवर "मूर्ख विधाने" करतात तेव्हा ते खूप त्रासदायक असते.

केंद्रीय मंत्री गोयल यांनी एका ट्विटमध्ये म्हटले होते की, "पवारजी त्याच सरकारचे भाग होते ज्यांनी बाटला हाऊस चकमकीत अश्रू ढाळले आणि जेव्हा भारतीय भूमीवर दहशतवादी हल्ले झाले तेव्हा झोपले होते."