Somali Sports Athlete
नवी दिल्ली- चीनमध्ये जागतिक विद्यापीठ खेळांचे आयोजन केले जात आहे. या खेळामध्ये सोमालिया देशाच्या एका महिला खेळाडूने नकोसा विक्रम केला आहे. विशेष म्हणजे या मुद्द्यावरुन सोमालिया देशाला जाहीररित्या माफी मागावी लागलीय. याशिवाय सोमालिया देशाच्या नागरिकांनी संबंधित अधिकाऱ्यांना काढून टाकण्याची मागणी केली आहे. चीनमध्ये 28 ऑगस्ट ते 8 सप्टेंबर या काळात जागतिक विद्यापीठ खेळांचे आयोजन केलंय.
स्पर्धेसाठी सोमालियाने 100 मीटर रेससाठी नसरा अबुबकर अली नावाच्या महिलेला मैदानात उतरवलं होतं. या स्पर्धकाने विजेता उमेदवारापेक्षा दुप्पट वेळ घेतला. या घटनेनंतर सोमालियाचे क्रिडा मंत्री मोहम्मद बर्रे मोहमूद यांना नसरा अबुबकर अली हिला स्पर्धेत उतरवल्याप्रकरणी जाहीर माफी मागावी लागली. माहितीनुसार, नसरा अबुबकर अली या महिलेला कोणत्याही उच्च स्तरीय खेळांच्या सामन्यात खेळल्याचा अनुभव नाही.
नसरा अबुबकर अली इतर स्पर्धकांपेक्षा खूपच मागे राहिल्याचं व्हिडिओमध्ये पाहायला मिळतंय. शेवटी ती हसत हसतच रेस पूर्ण करते. नसराने 21.81 सेंकदात ही स्पर्धा पूर्ण केली, विजेता उमेदवारापेक्षा 10 सेकंद तिने जास्त वेळ घेतला. सोमालियाच्या क्रिडा मंत्र्यानी या घटनेला लाजीरवाणे म्हटलं आहे. ते म्हणाले की, चीनमध्ये जे झालं ते सोमालियाचं प्रतिनिधित्व करत नाही. मी तमाम सोमालिया जनतेची माफी मागतो.
रिपोर्टनुसार, 'द सोमाली एथलीट फेडरेशन'ची अध्यक्ष खादिज अदेन दाहिर यांना निलंबित करण्यात आलं आहे. व्हिडिओ व्हायरल झाल्यानंतर सोमालिया जनतेने नाराजी व्यक्त केली आहे. जागतिक स्पर्धेमध्ये अशाप्रकारची कामगिरी पाहायला मिळणे, अत्यंत लज्जास्पद आहे. खेळाडू देशाचं प्रतिनिधित्व करत असतात. त्यामुळे देशाची मान शरमेनं खाली जाते. अशा खेळाडूंची निवड कोण करतं? सर्वकाही चीड आणणारं आहे, अशी भावना सोमालिया जनतेने सोशल मीडियावरुन व्यक्त केली आहे.
सोमालिया सरकारने याप्रकरणावर सारवासारव करण्याचा प्रयत्न केला आहे. देशाने या स्पर्धेसाठी कोणाचीही निवड केलेली नाही. त्यामुळे स्पर्धक तेथे कशी पोहोचली. कोणत्या आधारावर खेळाडूची निवड करण्यात आली, याची चौकशी केली जाईल.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
