Swastika Symbol : ऑस्ट्रेलियात 'स्वस्तिक' चिन्हावर बंदी; संसदेत विधेयकाला मंजुरी

स्वस्तिकाकडं (Swastika Symbol) हिंदू धर्मात मोठ्या श्रद्धेनं पाहिलं जातं. मात्र, गेल्या काही दिवसांपासून 'स्वस्तिक' चुकीच्या कारणांमुळं पुन्हा चर्चेत आलंय. ऑस्ट्रेलियातील (Australia) दोन राज्यांनी या चिन्हावर बंदी घालण्याचा निर्णय घेतलाय. असं म्हटलं जातंय की, हे चिन्ह नाझींचं प्रतीक आहे.

स्वस्तिक चिन्ह कोणत्याही प्रकारे दाखवणं गुन्हा

ऑस्ट्रेलियानं हे चिन्ह गुन्हेगारीच्या श्रेणीत ठेवलंय. वास्तविक गार्डियनच्या वृत्तानुसार, ऑस्ट्रेलिया, साउथ वेल्स आणि व्हिक्टोरिया या दोन राज्यांमध्ये स्वस्तिकवर बंदी घालण्यात आलीय. इथं स्वस्तिक चिन्ह कोणत्याही प्रकारे दाखवणं हा गुन्हा मानला जाणार आहे. याशिवाय, ऑस्ट्रेलियाच्या क्वीन्सलँड आणि तस्मानियानंही स्वस्तिकावर बंदी घालण्याची चर्चा केलीय. ऑस्ट्रेलियानं हा निर्णय अचानक घेतला नसून, त्यावर बंदी घालण्याची तयारी आधीच सुरू होती.

नाझी प्रतीक बंदी विधेयकाला संसदेत मंजुरी

अहवालानुसार, सुमारे एक वर्षाच्या चर्चेनंतर आणि विविध समुदायांशी सल्लामसलत केल्यानंतर, आणलेलं विधेयक व्हिक्टोरिया राज्याच्या संसदेनं गेल्या आठवड्यात मंजूर केलं. याअंतर्गत राज्यात नाझी चिन्हं दाखवणं गुन्हा ठरला आहे. नाझी प्रतीक बंदी विधेयक 2002 ला मंगळवारी संसदेनं मंजुरी दिली. न्यू साउथ वेल्सचे अॅटर्नी जनरल मार्क स्पीकमन यांनी मंगळवारी संसदेत सांगितलं की, 'नाझी स्वस्तिकनं यहुदी धर्मासह समुदायाच्या सदस्यांना हानी पोहोचवलीय.'

फिनलंडनं हवाई दलाच्या चिन्हावरून स्वस्तिक हटवलं

इतकंच नाही तर या विधेयकानुसार, नाझी चिन्ह दाखवणं हा गुन्हा ठरणार असून त्यासाठी 22 हजार ऑस्ट्रेलियन डॉलर (सुमारे 12 लाख रुपये) दंड किंवा 12 महिने तुरुंगवास किंवा दोन्ही शिक्षा होऊ शकतात. याआधी जुलैमध्ये फिनलंड राज्यानं आपल्या हवाई दलाच्या चिन्हावरून स्वस्तिक चिन्ह काढून टाकलं होतं.

'स्वस्तिक हे नाझीचं प्रतीक'

हे विधेयक मंजूर होताच, अनेक प्रकारच्या चर्चांना उधाण आलंय. न्यू साउथ वेल्समधील ज्यू बोर्ड ऑफ डेप्युटीजचे सीईओ डॅरेन बार्क्स म्हणतात की, स्वस्तिक हे नाझींचं प्रतीक आहे. त्यातून हिंसा दिसून येते. कट्टरपंथी संघटना त्याचा वापर भरतीसाठी करतात. आपल्या राज्यात त्याच्या कामगिरीवर बंदी घालण्याची चर्चा खूप दिवसांपासून होती.