Twitter खरेदी करण्यापासून ते डील संपेपर्यंत नेमकं काय घडलं?

Elon Musk Cancels Twitter Deal : Twitter खरेदीचा करार रद्द करण्यात आलाय. त्यामुळं Twitter आता एलन मस्क (Elon Musk) यांच्याविरोधात खटला दाखल केला जाणार आहे, अशी घोषणा ट्विटरनं केलीय. दरम्यान, ट्विटरनं बनावट खात्यांची माहिती न दिल्यानं हा करार रद्द करत असल्याची घोषणा एलन मस्क यांनी केली. तब्बल 44 अब्ज डॉलरचा करार रद्द करण्यात आलाय, त्यामुळं Twitter ला मोठा धक्का बसलाय.

टेस्लाचे सीईओ आणि जगातील सर्वात श्रीमंत व्यक्ती एलन मस्क यांनी शुक्रवारी ट्विटर खरेदी करार रद्द केला. यामुळं उद्योगक्षेत्रात मोठी चर्चा सुरु झाली आहे. ट्विटरच्या बोर्डाच्यावतीनं (Twitter) बनावट खात्यांची खरी संख्या लपवून चुकीची आणि अपूर्ण माहिती दिल्यानं हा निर्णय घेतल्याचं मस्कचं म्हणणं आहे. इलॉन मस्क यांच्यावतीनं यूएस सिक्युरिटीज अॅण्ड एक्सचेंज कमिशनला (SEC) सांगितलं की, 'कराराच्या वेळी ट्विटरनं करारामध्ये चुकीची माहिती दिली होती, ज्यामुळं 44 अब्ज डॉलरचा ट्विटर करार संपुष्टात येत आहे.'

टाइमलाइनच्या माध्यमातून समजून घेऊ, ट्विटरच्या खरेदीपासून डील संपेपर्यंत काय झालं?

• 4 एप्रिल - एलन मस्क यांनी ट्विटरमधील 9 टक्क्यांहून अधिक भागीदारी उघड केली.

• 5 एप्रिल - ट्विटरन जाहीर केलं की, मस्क कंपनीच्या बोर्डात सामील होईल.

• 10 एप्रिल - ट्विटरच्या घोषणेनंतर, मस्कनं धक्कादायक निर्णय घेतला आणि ट्विटरच्या बोर्डात सामील होण्यास नकार दिला.

• 4 एप्रिल - मस्कनं पुन्हा एकदा प्रति शेअर $54.20 ऑफर केलं, जे Twitter च्या एप्रिल 1 च्या बंद किमतीपेक्षा 38 टक्के प्रीमियम आहे.

• 21 एप्रिल - मस्कनं ट्विटर डीलसाठी $46.5 अब्ज निधी उभारला.

• 25 एप्रिल - ट्विटर बोर्डानं मस्कचा प्रस्ताव स्वीकारला.

• 29 एप्रिल - मस्कनं टेकओव्हरला वित्तपुरवठा करण्यासाठी टेस्लाच्या $8 बिलियन पेक्षा जास्त किमतीचं शेअर्स विकलं.

• 2 मे - पुढील हंगामात मस्कनं अधिक बाहेरील गुंतवणूकदार मिळवण्याचा प्रयत्न केला.

• 5 मे - मस्कनं नंतर $7.14 अब्ज निधीचं अनावरण केलं.

• 11 मे - ट्विटरचे सह-संस्थापक जॅक डोर्सी म्हणाले, मस्कच्या अधिग्रहणानंतर ते सीईओ म्हणून परत येणार नाहीत.

• 13 मे - स्पॅम आणि बनावट खात्यांचं पुनरावलोकन करण्यासाठी ट्विटर डील होल्डवर ठेवल्याचं मस्कचं म्हणणं आहे. तथापि, मस्कनं नंतर ट्विट केलं की, आपण या करारासाठी वचनबद्ध आहोत.

• 25 मे - ट्विटरच्या गुंतवणुकदारांनी पुढील सत्रात मस्क सहाय्यकांना पुन्हा बोर्डात समाविष्ट करण्याविरुद्ध मत दिलं.

• 26 मे - मस्कनं ट्विटरच्या गुंतवणुकदारांच्या अधिग्रहणादरम्यान स्टॉकमध्ये "फेरफार" केल्याबद्दल खटला भरला.

• 6 जून - ट्विटर स्पॅम आणि बनावट खात्यांचा डेटा प्रदान करण्यात अयशस्वी झाला तर करार रद्द केला जाईल, असं मस्क म्हणाला.

• 8 जुलै - ट्विटरनं विलीनीकरणाच्या करारातील अनेक तरतुदींचं उल्लंघन केल्यामुळं हा करार संपुष्टात आणत आहे, असंही मस्कनं सांगितलं.

बनावट-स्पॅम खात्याचे तपशील दिले नाहीत

एसईसीमध्ये एलन मस्क यांनी सांगितलं की, ट्विटरवरील बनावट आणि स्पॅम खात्यांची संख्या, ही खाती कॅप्चर करण्याच्या पद्धती आणि कारवाई करण्याच्या पद्धतींबद्दल माहिती हा करार होण्यासाठी महत्त्वपूर्ण मुद्दे आहेत. या संदर्भात एलन मस्क आणि त्यांची टीम गेल्या 2 महिन्यांपासून सतत ट्विटरवर संपर्क साधून माहिती घेत होती. पण, प्रत्येकवेळी ट्विटरचे बोर्ड एकतर माहिती देण्यास टाळाटाळ करत होतं किंवा अर्धी अपूर्ण माहिती देत ​​होतं.

ट्विटरची ही वृत्ती पाहून टेस्लाचे सीईओ एलन मस्क यांनी ट्विटरसोबतचा 44 अब्ज डॉलर्समध्ये खरेदी करण्याचा करार पूर्णपणे रद्द केला. एलन मस्कच्या टीमनं 5 वेळा माहिती मागवली. यूएस सिक्युरिटी अॅण्ड एक्स्चेंज कमिशनला (एसईसी) एलन मस्क यांनी सांगितलं की ट्विटरनं 9 मे, 25 मे, मे, 6 जून, 17 जून आणि 29 जून रोजी त्यांच्या प्लॅटफॉर्मवर बनावट आणि स्पॅम खात्यांबाबत 5 वेळा लिहिलं आहे. त्याला त्यांनी प्रतिसाद दिलेला नाही.

ट्विटर बोर्ड मस्कच्या टीमशी खोटं बोललं?

एलन मस्क यांच्यावतीनं सांगण्यात आलं की, कराराच्या वेळी ट्विटरनं एसईसीला सांगितलं होतं की त्यांच्या प्लॅटफॉर्मवर 5 टक्के बनावट आणि स्पॅम खाती आहेत. जरी मस्कच्या टीमचा असा विश्वास आहे की, ट्विटर खोटे बोलले आणि बनावट खात्यांची संख्या यापेक्षा कितीतरी जास्त आहे. एलन मस्कच्या टीमच्या म्हणण्यानुसार, ट्विटर बरीच माहिती लपवत आहे. कारण, ट्विटरच्या कमाईपैकी 90 टक्के जाहिरातींमधून येते.

मस्क आणि ट्विटरमध्ये आता कायदेशीर लढाई

ट्विटर आणि मस्क यांच्यातील खरेदी करारानुसार, करार रद्द झाल्यास मस्क यांना अटींनुसार 1 अरब डॉलर करारापोटी शुल्क द्यावे लागेल. पण, मस्क फक्त ब्रेक-अप फी भरुन सुटू शकत नाहीत. करारात अशी तरतूद समाविष्ट आहे जी मस्क यांना करार पूर्ण करण्यास भाग पाडू शकते. याचा अर्थ मस्क आणि ट्विटरमध्ये आता प्रदीर्घ कायदेशीर लढाई होऊ शकते.