फेसबुकनंतर ट्विटरनेही जाहीर केली तालिबानसंदर्भात आपली भुमिका; म्हणाले...

नवी दिल्ली : तालिबानने संपूर्ण अफगाणिस्तान देशाचा ताबा घेतला आहे. या पार्श्वभूमीवर आता जगातील सर्वांत मोठी सोशल मीडिया कंपनी फेसबुक कंपनीने मोठा निर्णय घेतला आहे. फेसबुकने तालिबानच्या विरोधात मोठी कारवाई केली आहे. फेसबुकने म्हटलंय की, अमेरिकेच्या कायद्याअंतर्गत तालिबान एक दहशतवादी संघटना आहे. आणि आम्ही आमच्या Dangerous Organisation Policies अंतर्गत त्यांच्यावर बंदी घातली आहे. दुसरीकडे ट्विटरनेही आपली भुमिका जाहिर केली आहे.

ट्विटरच्या प्रवक्त्यांनी म्हटलंय की, अफगाणिस्तानमधील परिस्थिती गतीने बदलत आहे. तिथले लोक मदतीसाठी ट्विटरचा वापर करत आहे, हे आम्हाला आढळून आलंय. लोकांना सुरक्षित राखणं, हे ट्विटरचं पहिलं प्राधान्य असेल, त्यासाठी आम्ही नेहमी दक्ष असू, असं ट्विटरच्या प्रवक्त्यांनी म्हटलंय.

पुढे त्यांनी म्हटलंय की, आम्ही ट्विटरचे नियम सक्रियपणे राबवण्यावर भर देत आहोत आणि आमच्या धोरणांचं उल्लंघन करणाऱ्या कंटेटबाबत आम्ही लक्ष ठेवून आहोत. विशेषत: हिंसेचं उदात्तीकरणाबाबत आम्ही पुनरावलोकन करु.

फेसबुकने केली बंदीची कारवाई

फेसबुकने तालिबानच्या विरोधात मोठी कारवाई केली आहे. फेसबुकने म्हटलंय की, अमेरिकेच्या कायद्याअंतर्गत तालिबान एक दहशतवादी संघटना आहे. आणि आम्ही आमच्या Dangerous Organisation Policies अंतर्गत त्यांच्यावर बंदी घातली आहे. त्यामुळे तालिबानसाठी फेसबुकच्या सर्व सेवा बंद करण्याचा मोठा निर्णय घेण्यात आला आहे. याशिवाय तालिबानसंदर्भातील सगळे अकाउंट डिलीट केले जातील. तसेच तालिबानच्या समर्थनार्थ पोस्ट करणाऱ्या सर्व अकाउंट्सवर बंदी घातली जाईल. फेसबुकच्या प्रवक्त्यांनी म्हटलंय की, कंपनीकडे दरी आणि पश्तो भाषेतील तज्ज्ञ लोकांची संपूर्ण टीम आहे जी स्थानिक कंटेटवर लक्ष ठेवून आहे तसेच आम्हाला त्यासंदर्भात माहिती देत आहे. फेसबुकने म्हटलंय की, गेल्या अनेक वर्षांपासून तालिबानचे अनेक नेते आणि प्रवक्ते फेसबुकवर आहेत, ज्यांच्या फॉलोवर्सची संख्या लाखोंच्या संख्येने आहे. फेसबुक, फेसबुक मॅसेंजर, इन्स्टाग्राम आणि व्हॉट्सऍपवरुन देखील तालिबानला बॅन करण्यात आलंय.