कुटुंबासह अश्रफ घनींना माणुसकीच्या नात्यानं आश्रय दिलाय - UAE

नवी दिल्ली : अफगाणिस्तानवर तालिबान्यांनी केलेल्या कब्ज्यानंतर राष्ट्राध्यक्ष अश्रफ घनी यांनी कुटुंबियांसह देशातून पलायन केलं. घनी ताजिकिस्तानला पळून गेल्याचं सांगितलं जात होतं. पण आता ते युनाटेड अरब अमिरातीमध्ये (UAE) असल्याचं समोर आलं आहे. कारण UAE नं याबाबत स्पष्टीकरण देताना आम्ही माणुसकीच्या नात्यानं अश्रफ घनी आणि त्यांच्या कुटुंबियांना आश्रय दिल्याचं एका निवेदनाद्वारे स्पष्ट केलं आहे.

UAEच्या मिनिस्ट्री ऑफ फॉरेन अफेअर्स आणि इंटरनॅशनल कोऑपरेशननं हे स्पष्ट केलं की, "आम्ही मानवतेच्या नात्यानं अफगाणिस्तानचे राष्ट्राध्यक्ष अश्रफ घनी आणि त्यांच्या कुटुंबाचं स्वागत केलं आहे." UAE च्या वॅम न्यूजन याबाबत वृत्त दिलं आहे. पण एका वाक्याच्या य़ा निवेदनात अश्रफ घनी नेमके कुठे आहेत? हे स्पष्ट होऊ शकलेलं नाही.

तालिबान्यांनी अफगाणिस्तानची राजधानी काबूलवर विजय मिळवल्यानंतर ७२ वर्षीय राष्ट्राध्यक्ष अश्रफ घनी यांनी आपल्या कुटुंबासह देशातून पलायन केलं होतं. दरम्यान, अमेरिकेचे राष्ट्राध्यक्ष जो बायडन यांनी अफगाणिस्तानच्या स्थितीबाबत बोलताना म्हटलं होतं की, "अश्रफ घनी यांचं प्रशासनच अफगाणमधील परिस्थितीला कारणीभूत आहे. अफगाणिस्तानातील राजकीय नेते या बिकट प्रसंगात एकत्र येऊन देशाच्या भविष्यासाठी वाटाघाटी करण्यात कमी पडले."

त्याचबरोबर रशियाच्या राजदुतांनीही आरोप केला की, "अफगाणिस्तानचे राष्ट्राध्यक्ष घनी हे काबूलमधून कार, हेलिकॉप्टर आणि सरकारी तिजोरीतील पैसा घेऊन फरार झाले आहेत."