UK Elections 2024: ऋषी सुनक यांनी पराभव स्वीकारला! लेबर पार्टी सत्ता स्थापन करणार, कीर स्टार्मर नवे पंतप्रधान

लंडन- ब्रिटनमध्ये सार्वत्रिक निवडणुकीचे निकाल जवळजवळ समोर आले आहेत. यात लेबर पार्टीचा बहुमताने विजय झाल्याचं स्पष्ट होत आहे. याच पार्श्वभूमीवर ऋषी सुनक यांनी आपला आणि आपल्या पक्षाचा पराभव मान्य केला आहे. लेबर पार्टीने बहुमताचा आकडा पार केला आहे. त्यामुळे ब्रिटनमध्ये सत्ता बदल होणार असून कीर स्टार्मर नवे पंतप्रधान होतील.

गेल्या दहा वर्षांपासून सत्तेत असलेल्या कंझर्व्हेटिव्ह पक्षाला मोठा धक्का बसला आहे. लेबर पार्टीला बहुमत मिळत असल्याचं स्पष्ट होताच सध्याचे पंतप्रधान ऋषी सुनक यांनी माध्यमांसमोर येऊन आपल्या पक्षाचा पराभव मान्य केला. पक्षाला विजय मिळवून देता आलं नाही, याबाबत त्यांनी पक्षाची माफी देखील मागितली आहे. विजयी लेबर पार्टीचे त्यांनी अभिनंदन केले आहे.

सुनक म्हणाले की, लेबर पार्टीने बहुमताचा आकडा पार केला आहे. मी सर कीर स्टार्मन यांचे विजयाबद्दल अभिनंदन करतो. आता शांततेत सत्ताहस्तांतरण होईल. जनतेने दिलेला कौल मी मान्य करतो. पराभवातून खूप काही शिकायचं आहे. मी पराभवाची पूर्ण जबाबदारी घेतो. पक्षातील नेत्यांनी अहोरात्र प्रयत्न केले होते, पण शेवटी आमचा पराभव झालाय. आम्ही समाजासाठी काम करत राहू. मी पक्षाची माफी मागतो.

ब्रिटनमध्ये एकूण ६५० जागांसाठी निवडणूक झाली होती. बहुमतासाठी ३२६ जागांची आवश्यकता असते. सध्या लेबर पार्टीने ३९२ जागांवर आघाडी घेतली आहे, तर कंझर्व्हेटिव्ह पार्टी १०१ जागावर आघाडीवर आहे. लेबर पार्टी बहुमताचा आकडा सहज पार करत असल्याचं सध्याचं चित्र आहे. एक्झिट पोलमध्ये देखील लेबर पार्टीच्या प्रचंड विजयाचा अंदाज व्यक्त करण्यात आला होता. एक्झिट पोलनुसारच सध्याचा कल दिसत आहे.

ऋषी सुनक यांनी वेळेआधीच सार्वत्रिक निवडणुकांची घोषणा केली होती. त्यामुळे अनेकांच्या भुवया उंचावल्या होत्या. कंझर्व्हेटिव्ह पक्षाबाबत ब्रिटनच्या जनतेमध्ये काहीसे नकारात्मक वातावरण होते. त्यामुळे त्यांनी वेळेआधी निवडणुका जाहीर केल्याने त्यांनी ही मोठी रिस्क घेतल्याचं बोललं जात होतं. ऋषी सुनक यांना जनतेने नाकारल्याचं स्पष्ट झालं आहे.