अमेरिका तालिबानच्या राजवटीला मान्यता देईल, पण....

वॉशिंग्टन: २० वर्षानंतर पुन्हा एकदा तालिबानच्या हाती सत्ता (power to taliban) गेल्यामुळे संपूर्ण अफगाणिस्तानात (Afganistan) भीती, दहशत आणि घबराटीचे वातावरण आहे. कारण अफगाणिस्तानातील तालिबानची जुलमी राजवट जगाने अनुभवली आहे. तालिबान राज येणार हे स्पष्ट होताच अनेक देशांनी तालिबानला मान्यता देण्यास नकार दिला आहे.

२० वर्षांपूर्वी अफगाणिस्तानातील तालिबानची सत्ता उलथवणारी अमेरिका ऑगस्ट अखेरपर्यंत तिथून पूर्णपणे बाहेर निघणार आहे. त्यामुळे तालिबानला पुन्हा एकदा अफगाणिस्तानवर वर्चस्व निर्माण करणे शक्य झालं आहे. अमेरिकेने तालिबानसोबत काम करण्याची तयारी दाखवली आहे.

तालिबानने लोकांच्या अधिकाराचा आदर केला, तर त्यांच्यासोबत काम करण्याची इच्छा आहे असे अमेरिकेने म्हटले आहे. तालिबानने दहशतवादाला थारा देऊ नये, तसेच महिला आणि मुलीच्या अधिकाराचे रक्षण करावे असे अमेरिकेचे परराष्ट्रमंत्री अँटनी ब्लिंकन यांनी म्हटलं आहे. अमेरिकेच्या या अटी तालिबानला मान्य असतील, तरच अमेरिका तालिबान सोबत काम करेल.

अँटनी ब्लिंकन यांनी रविवारी सीएनएनला दिलेल्या मुलाखतीत हे सांगितले. "'भविष्यात अफगाण सरकारने नागरिकांना त्यांचे अधिकार द्यावेत, दहशतवादाला थारा देऊ नये अशाच सरकारसोबत आम्ही काम करु, त्यांना मान्यता देऊ" असं ब्लिंकन यांनी सांगितलं. त्यांना बायडेन प्रशासन तालिबान सरकारला मान्यता देणार का? असा प्रश्न विचारण्यात आला होता.