लाहोर: स्त्री-पुरूष समानता हा सध्याचा विकासाचा मंत्र बनला आहे. कोणत्याही क्षेत्रात महिला पुरूषांपेक्षा मागे नाहीत हे नारीशक्तीने सिद्ध केलं आहे. कार्पोरेट क्षेत्रापासून ते अगदी युद्धभूमीपर्यंत सर्वत्र स्त्रिया महिलांच्या बरोबरीने आपापल्या भूमिका चोख बजावताना दिसत आहेत. लग्नासाठी प्रपोज करण्याच्या पद्धतीतदेखील आता असाच काहीसा ट्रेंड दिसू लागला आहे. पूर्वी मुलगा गुडघ्यावर बसून मुलीला प्रपोज करत असे. पण सध्या एका व्हायरल झालेल्या व्हिडीओमध्ये एक मुलगी स्वत: गुडघ्यावर बसून मुलाला प्रपोज करताना दिसते आहे. महत्त्वाची बाब म्हणजे हे दोघे ज्या विद्यापीठातील विद्यार्थी आहेत, त्या विद्यापीठाने त्यांच्यावर कारवाई करत त्यांना निलंबित केल्याची घटना घडली आहे.
पाकिस्तानमधील लाहोर विद्यापीठातील हा प्रकार आहे. लाहोर विद्यापीठाच्या परिसरात एका मुलीने मुलाला इतर विद्यार्थ्यांसमोर जाहीरपणे लग्नासाठी मागणी घातली. याच मुद्द्यावरून लाहोर विद्यापीठात खळबळ माजली. मुलीने मुलाला गुडघ्यावर बसून प्रपोज केल्याचा व्हिडीओ सध्या खूपच व्हायरल झाला आहे. मुलाने मुलीला प्रपोज केल्याचा व्हिडीओ किंवा फोटो अनेकदा पाहायला मिळतो. पण मुलीने स्वत: गुडघ्यावर बसून मुलाला सर्वांसमोर प्रपोज करण्याची घटना ट्विटरवर चांगलीच गाजली. त्या मुलीने गुलाबाचं फुल देऊन मुलावरील आपलं प्रेम व्यक्त केलं. मुलाला हे गोड सर्प्राइज मिळाल्यानंतर मुलाने गुलाबाचा आणि तिच्या प्रेमाचा स्वीकार केला आणि तिची प्रेमाने गळाभेट घेतली.
जाहीरपणे प्रेम व्यक्त करणं आणि मुला-मुलीने जाहीर गळाभेट घेणं हा मुद्दा लाहोर विद्यापीठाच्या प्रशासनाचा खटकला. त्यामुळे विद्यापीठाने या जोडीचे थेट निलंबन केलं. जेव्हा मुलगी गुडघ्यावर बसून आपलं प्रेम व्यक्त करत होती त्यावेळी आजूबाजूला इतर विद्यार्थ्यांची गर्दी झाली. तिच्या या प्रपोजलचं इतर विद्यार्थ्यांनी छानपैकी टाळ्यांच्या कडकडाटात स्वागत केलं. अगदी बॉलिवूडच्या चित्रपटासारखं सारं वातावरण खूपच रोमँटिक झालं होतं. पण हा प्रकार विद्यापीठ प्रशासनाला अजिबातच रूचला नाही. त्यांनी शुक्रवारी परिपत्रक काढून थेट या दोघांवर निलंबनाची कारवाई केली.
विद्यार्थ्यांवर निलंबनाची कारवाई करण्यात आल्याची बातमीदेखील ट्विटरवर वाऱ्यासारखी पसरली. त्यामुळे अनेकांनी विद्यापाठी प्रशासनाच्या भूमिकेवर प्रश्न उपस्थित केले. विद्यापीठाच्या परिपत्रकात असं नमूद करण्यात आले आहे की विद्यार्थ्यांनी विद्यापीठाच्या नियमांचे उल्लंघन केल्याने त्यांच्यावर निलंबनाची कारवाई करण्यात आली आहे. परंतु, ट्विटर युझर्सने मात्र या मुद्द्यावरून विद्यापीठावर टीका केली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.