पेंटागॉनकडून स्ट्राइकची तयारी सुरु, अमेरिकेचा बदला घेण्याचा निर्धार

वॉशिंग्टन: अमेरिका ३१ ऑगस्टपर्यंत अफगाणिस्तान (Afganistan) सोडणार असली, तरी काबूल विमानतळ परिसरात (Kabul airport area) झालेल्या हल्ल्याला अमेरिकेकडून प्रत्युत्तर दिले जाईल. अमेरिकेचे राष्ट्राध्यक्ष जो बायडेन (jo biden) यांनी तसे स्पष्ट संकेत दिले आहेत. काल काबूल विमानतळाचा परिसर दोन शक्तीशाली बॉम्बस्फोटांनी (bomb blast) हादरला. खास अमेरिकन्सना लक्ष्य करण्याच्या उद्देशाने हे बॉम्बस्फोट घडवण्यात आले. या स्फोटामध्ये ७० पेक्षा जास्त जणांचा मृत्यू झाला आहे. यामध्ये नागरिकांसह अमेरिकन सैनिकांचाही समावेश आहे.

अनेक अमेरिकन सैनिक या स्फोटात मृत्यूमुखी पडले आहेत. काही सैनिक जखमी आहेत. दशकभरात पहिल्यांदाच मनुष्यहानीच्या रुपाने अमेरिकेचं मोठं नुकसान झालय. इस्लामिक स्टेटने या आत्मघातकी बॉम्बस्फोटांची जबाबदारी घेतली आहे. स्फोटाच्या या घटनेवर बोलताना अमेरिकन राष्ट्राध्यक्ष जो बायडेन भावूक झाले होते. त्यांनी बदला घेण्याचा निर्धार बोलून दाखवलाय. "आम्ही विसरणार नाही आणि माफही करणार नाही. आम्ही तुम्हाला शोधून काढू आणि तुम्हाला त्याची किंमत चुकवावी लागेल" असं बायडेन यांनी म्हटलं आहे.

अफगाणिस्तानातून अमेरिकन नागरिकांना बाहेर काढण्याचं काम सुरु राहील. पुढच्या मंगळवारपर्यंत आपल्या सर्व नागरिकांना बाहेर काढून अफगाणिस्तान सोडण्याची अमेरिकेची योजना आहे. त्यात कुठलाही बदल झालेला नाही. जवळपास १ हजार अमेरिकन नागरिक आणि सर्वसामान्य अफगाणि काबुलमधून निघण्यासाठी प्रयत्न करत आहेत. "मी माझ्या कमांडर्सना आयएसआयएस-के ची संपत्ती, नेतृत्व आणि सुविधांवर स्ट्राइक करण्यासाठी प्लान बनवण्याचे आदेश दिले आहेत. आम्ही आमच्या सोयीने हल्ल्याचं ठिकाणं आणि वेळ ठरवून शक्तीशाली प्रहार करु" असे बायडेन म्हणाले.

ISIS-K आणि तालिबानने संगनमताने हे घडवून आणल्याचे कोणतेही पुरावे नसल्याचे बायडेन यांनी सांगितले. सध्या अफगाणिस्तानवर तालिबानची सत्ता आहे. मागच्या दोन-तीन दिवसांपासून काबूल विमानतळ परिसरात काही तरी घडू शकते, असे इशारे गुप्तचर यंत्रणांकडून दिले जात होते. अखेर काल हा परिसर शक्तीशाली बॉम्बस्फोटांनी हादरला.