‘अल्झायमर डे’; दर ३ सेकंदात एकाला स्मृतीभ्रंश

नागपूर : वय वाढले की विसरभोळेपणा आपोआपच येतो, असे म्हणतात. परंतु, एखादी गोष्ट तुमच्या लक्षात आहे आणि तरुणवयातही ती तुम्ही चटकन विसरत असाल, काही क्षणांपूर्वी केलेल्या हालचाली, सभोवताली वावरणाऱ्या व्यक्तींना क्षणात विसरत असाल तर तुमची ‘अल्झायमर’ आजाराशी मैत्री होत असल्याचे नक्की समजा. पूर्वी हा आजार वयाची ऐंशी लोटलेल्या वृद्धांमध्ये आढळून येत होता; परंतु अलीकडे साठी उलटलेल्या व्यक्तींमध्ये अल्झायमर (स्मृतीभ्रंश) आजार दिसून येतो.

स्मृतीभ्रंश हा स्मृती, विचार, भावना आणि वागणुकीत अडचणी निर्माण करणारा मेंदूचा आजार आहे. देशात वयाची साठी-पासष्टी उलटलेल्या एकूण व्यक्तींच्या १० टक्के व्यक्ती या आजाराच्या विळख्यात सापडल्या आहेत. जसजसे वय वाढते, तसतशी या आजाराची टक्केवारी दुपटीने वाढते. जागतिक आरोग्य संघटनेने १९९४ मध्ये या आजाराची दखल घेतली. दरवर्षी २१ सप्टेंबर रोजी अल्झायमर दिवस जगभरात पाळला जातो. सध्या जगात स्मृतीभ्रंशाचे सुमारे ५ कोटी लोक आहेत. भारतात एक हजार पैकी ४ लोकांना हा आजार दिसून येतो. पुढील १० वर्षांत याचे प्रमाण दुप्पट होईल.

अशी आहेत लक्षणे

• विसरभोळेपणा

• घराचा पत्ता विसरणे

• नातेवाइकांची नावे विसरणे

• नवीन गोष्टी शिकण्यात अडचण

• कपडे व्यवस्थित न घालणे

• अशी आहेत कारणे

• मेंदू पेशींच्या क्रयशक्तीचा ऱ्हास

• मेंदू आकुंचन पावणे

• मेंदूपेशी खराब होणे

• मेंदूला रक्तपुरवठा वाहिन्यांत अवरोध