हेल्दी फूड : अधूनमधूनचा उपवास फायद्याचा कसा कराल?

आपण सुरुवातीला अधूनमधून (इंटरमिटंट) उपवास म्हणजे काय, हे जाणून घेऊयात. हा शिस्तबद्ध जीवनपद्धतीचा एक भाग असून, १६ तासांचा उपवास व ८ तास खाणे अशी त्याची व्याख्या आहे.

अधूनमधून उपवासाचा नियम

हे अतिशय सोपे आहे. तुम्ही सलग १६ तास काहीच खाऊ नका व उरलेल्या आठ तासांत तुमचा आहार घ्या.

या काळात तुम्ही काय आहार घ्याल?

पाणी, ब्लॅक कॉफी, ब्लॅक टी यांसारखे झिरो कॅलरी असलेले व तुमच्यासाठी फायद्याचे पदार्थ.

तुम्ही हवे ते खाऊ शकता का?

नक्कीच नाही. तुम्ही अधिक प्रथिने, कॉप्लेक्स कार्ब आणि उपयुक्त फॅट्स असलेला तुम्हाला फायद्याचा आहार घेऊ शकता. तुमचे ध्येय वजन कमी करण्याचे असल्यास अधूनमधून उपवास करीत कॅलरीजचे प्रमाण कमी ठेवणे फायद्याचे ठरते.

अधूनमधून उपवासामागचे विज्ञान काय?

तुम्ही उपवास करता, तेव्हा तुमच्या शरीरातील रक्तातील साखरेचे प्रमाण आणि इन्शुलिनची पातळी मोठ्या प्रमाणात कमी होते व त्याचबरोबर ह्यूमन ग्रोथ हार्मोन्समध्ये मोठी वाढ नोंदविली जाते. त्यामुळेच अनेक जण वजन कमी करण्याचे ध्येय असल्यास अधूनमधून उपवास निवडतात, कारण त्यातून कॅलरीजचे प्रमाण नियंत्रणात राखले जाते आणि फॅट्स जळतात.

तुमच्यासाठी अधूनमधून उपवास फायद्याचा ठरेल का?

तुम्ही आरोग्यदायी पदार्थ खाणे, खाण्याचे प्रमाण नियंत्रणात ठेवणे आणि सातत्याने उपवास करणे या गोष्टींचे पालन केल्यास तुम्हाला आरोग्याचे खूप चांगले फायदे दिसून येतील.

हा फॅट्स कमी करण्याचा, तुमची चयापचायची स्थिती सुधारण्याचा खूप परिणामकारक मार्ग आहे. यामुळे तुमचे आयुष्य अगदी सुकर होते, हे नक्की.