तुमची प्रेमाची अभिव्यक्ती

तुमचे कुणावर तरी खूप प्रेम आहे, पण ती व्यक्ती तुमच्या प्रेमाचा स्वीकार करीत नाही. तुम्ही काय कराल?

• निराश व्हाल.

• प्रेमाचे द्वेषामध्ये रूपांतर करून सूड घेण्याची इच्छा कराल.

• पुनःपुन्हा तुमचे किती अधिक प्रेम आहे आणि ती व्यक्ती किती कमी प्रतिसाद देते याची आठवण करून देत राहाल.

• अति चिकित्साखोर आणि तऱ्हेवाईक वागाल.

• उगाच क्रोध आणि त्राग्याचे प्रसंग घडवाल.

• तुम्हाला अपमानित वाटेल आणि स्वतःचा सन्मान राखण्याचे प्रयत्न कराल.

• पुन्हा कधी प्रेम न करण्याची प्रतिज्ञा कराल.

• आपल्याला चांगली वर्तणूक मिळाली नाही असे समजून तुम्हाला दुःख होईल.

• तुम्ही अलिप्त आणि बेपर्वा बनू पाहता.

परंतु यापैकी कोणत्याही प्रतिक्रियेचा काही उपयोग होत नसल्याचे तुमच्या ध्यानात आलेच असेल. उलट अशापैकी कोणत्याही वर्तनाने परिस्थिती आणखीच बिघडते.

मग या परिस्थितीतून बाहेर कसे पडायचे? तुमच्यातील प्रेमाची भावना शाबूत कशी ठेवायची?

संयम राखा.

• एककेंद्रित राहा आणि तुमच्या प्रेमाच्या अभिव्यक्तीला एक मर्यादा असू द्या. काहीवेळा प्रेम अती व्यक्त केल्याने लोकांना अस्वस्थ वाटू शकते.

• तुमची प्रेमाच्या अभिव्यक्तीची पद्धत बदलून पाहा.

• ते तुमच्यावर प्रेम करतातच याची खात्री बाळगा. फक्त त्यांच्या अलग अभिव्यक्तीचा स्वीकार करा.

• एखाद्या आईला तीन अशी मुले आहेत, की जी वेगवेगळ्या पद्धतीने वागतात. एक खूप बोलते, एक बोलतच नाही आणि तिसरे सारखे हट्ट करीत असते. अशा वेळी ती आई तिन्हीही मुलांवर सारखेच प्रेम करते, त्यांची सारखीच काळजी घेते, होय ना?

• त्यांच्या तुमच्यावरील प्रेमाची खरीखुरी पावती द्या. यामुळे तुमच्या अपेक्षांच्या जागी कृतज्ञता निर्माण होईल. आणि तुम्ही जीवनात जेवढे अधिक कृतज्ञ असाल, तेवढे अधिक प्रेम तुम्हाला लाभते.

• यातना प्रेमामध्ये अपरिहार्य आहेत, हे ध्यानात असू द्या आणि त्यांची जबाबदारी घ्या.

  या जगामध्ये दुःख स्वाभाविक आणि कायम आहेच आणि तुम्ही एककेंद्रित, स्थिर नसाल, तर ते तुमच्या वाट्याला अधिक येते, याची जाणीव असू द्या.