Yoga For Blood Pressure : उच्च रक्तदाबाच्या समस्येपासून सुटका हवी आहे? मग, रोज करा ‘ही’ योगासने

Yoga For Blood Pressure : सध्याचे धकाधकीचे जीवन, बिघडलेला आहार आणि व्यायामाचा अभाव इत्यादी कारणांमुळे आरोग्याच्या समस्या वाढल्या आहेत. या समस्यांमध्ये उच्च रक्तदाबाचा ही समावेश आहे. उच्च रक्तदाब ही एक अशी समस्या आहे की, ज्याची लक्षणे दिसत नाहीत. परंतु, अचानकपणे ही समस्या तुमच्या हृदयासाठी धोकादायक स्थिती बनू शकते.

जर तुम्हाला उच्च रक्तदाबाची समस्या असेल तर या परिस्थितीकडे दुर्लक्ष अजिबात करू नका. कारण, याकडे दुर्लक्ष केले तर हृदयविकाराचा झटका किंवा पक्षाघाताचा धोका निर्माण होण्याची शक्यता जास्त प्रमाणात असते.

या समस्या टाळण्यासाठी तुम्ही नियमितपणे व्यायाम करणे आणि संतुलित आहार घेणे गरजेचे आहे. या कामी योगा तुमची मदत करू शकतो. आज आपण उच्च रक्तदाबाची समस्या नियंत्रित करण्यासाठी फायदेशीर असणाऱ्या काही योगासनांबद्दल जाणून घेणार आहोत.

बलासन

उच्च रक्तदाबाची समस्या असणाऱ्या लोकांसाठी हे योगासन अतिशय फायदेशीर आहे. हे योगासन नियमितपणे केल्याने तुमचा ताण कमी होतो आणि शरीरातील रक्ताभिसरणाची प्रक्रिया सुरळीत राहण्यास मदत होते. हे योगासन केल्याने आपले शरीर शांत होते आणि खांद्यावरील आणि मानेवरील ताण कमी होतो.

भूजंगासन

भूजंगासन हे योगासन आपल्या शरीरातील रक्त आणि ऑक्सिजनचे परिसंचारण करण्यास मदत करते. रोजच्या ताण-तणावापासून मुक्ती मिळवण्यासाठी हे योगासन फायदेशीर आहे. यासोबतच नियमितपणे हे योगासन केल्याने पाठदुखी आणि कंबरदुखीपासून आराम मिळतो.

हृदयाच्या आरोग्यासाठी आणि अस्थमाच्या रूग्णांसाठी देखील हे योगासन फायदेशीर आहे. उच्च रक्तदाबाची समस्या असणाऱ्या रूग्णांनी नियमितपणे या योगासनाचा सराव करावा. यामुळे, उच्च रक्तदाबाची समस्या नियंत्रित होण्यास मदत होईल.

सेतूबंधासन

सेतूबंधासनाचे आपल्या शरीराला अनेक फायदे होतात. रक्तदाब नियंत्रित ठेवण्यासाठी हे योगासन अतिशय उपयुक्त आहे. आपले मन शांत करण्यासाठी आणि ताण कमी करण्यासाठी नियमितपणे या योगासनाचा सराव करावा.

जर तुम्हाला नैराश्याची समस्या असेल तर त्यातून बाहेर पडण्यासाठी हे योगासन मदत करते. फक्त यासाठी तुम्ही रोज सराव करायला हवा. उच्च रक्तदाबाची समस्या नियंत्रित करण्यासोबतच, पोटाच्या समस्या आणि थकवा कमी करण्यासाठी हे योगासन अतिशय फायदेशीर आहे.