Children Health : लहान मुलांच्या 'या' चुकीच्या सवयी आरोग्यासाठी ठरू शकतात घातक, वेळीच द्या लक्ष !

Children Health : लहान मुलांमध्ये काही सवयी लहान वयात सामान्य विकासाचा भाग म्हणूनच दिसतात. ज्या तात्पुरत्या असून वेळेसोबत नाहीशा होतात. जर या सवयी सुरूच राहिल्या, तर मुख व दातांचे आरोग्य बिघडू शकते. जसे अंगठा चोखण्याची सवय असल्यास र, त, द शब्दांचा उच्चार बिघडू शकतात.

तीन वर्षांनंतरही बाळाचे अंगठा चोखणे सुरूच असेल, तर त्याच्या दातांवर परिणाम होतो. दात पुढे येण्याचा मोठा धोका असतो. दुधाचे दात पडल्यावर पक्के दात येताना दातासह हनुवटीचा आकार बिघडण्याची शक्यता असते.

चुकीच्या सवयीचा मुखावरच नाही, तर आरोग्यावरच व दिसण्यावरदेखील परिणाम होतो. पुढे त्यांच्या मानसिकतेवरही गंभीर परिणाम होण्याची शक्यता आहे. अशा सवयीच्या उपचारासाठी पालकांच्या सहकार्याची व मुलांच्या योग्य समुपदेशनाची गरज असते.

बऱ्याचदा या सवयीमागचे कारण हे मुलांमध्ये असलेली भीती किंवा तणाव असू शकते. यासाठी दंतवैद्यक यांच्याकडून उपचार घेणे गरजेचे आहे. विविध प्रकारच्या उपकरणांद्वारे जसे दातांना पिन लावणे, मुलांना मार्गदर्शन करणे अशा साह्यातून दंतवैद्यक निश्चितच या सवयी सोडविण्यासाठी मदत करत असतात.

मुलांच्या या सवयी घातक

• अंगठा चोखणे

• दातांनी नख तोडणे

• सतत ओठ चावणे

• तोंडाने श्वास घेणे

विविध सवयींचे दुष्परिणाम

• श्वासाची दुर्गंधी होणे. जीभ दाबल्याने तोंड कोरडे होऊ शकते.

• दात किडणे आणि हिरड्यांचे आजार होणे.

• बोलताना जीभ बाहेर काढणे.

• काही शब्द तोंडातल्या तोंडात बोलत असल्याचे दिसून येते.

• तोंडाच्या आसपासच्या उतींना मोठी हानी पोचते.