महिलांच्या आरोग्याची काळजी! आता पोस्टातही मिळणार 'सॅनिटरी नॅपकिन'

सातारा : महिलांच्या (Women) आरोग्याची काळजी आता डाक विभागही घेणार असून, एक सप्टेंबरपासून डाक कार्यालयात पर्यावरणपूरक आणि पुन्हा पुन्हा वापरता येतील असे सॅनिटरी नॅपकिन (Sanitary Napkin) उपलब्ध करून दिले जाणार आहे. हा अनोखा उपक्रम डाक विभाग (Postal Department) पी-पेस फाउंडेशनच्या सहकार्याने राबविणार आहे.

याबाबतची माहिती प्रवर अधीक्षिका अपराजिता म्रिधा यांनी दिली. आरोग्य पाहणीनुसार मासिक पाळीधारक महिलांपैकी फक्त ३६ टक्के महिलाच सॅनिटरी नॅपकिनचा वापर करतात. घरगुती पद्धतीवरच अनेक महिला अवलंबून राहतात. त्यामध्ये स्वच्छतेची कमतरता राहते. अनेक युवतींना, काम करणाऱ्या महिलांना विविध संसर्ग आणि मासिक पाळीच्या स्वच्छतेबाबत संवेदनशील समस्यांना सामोरे जावे लागते. डाक विभागाने आजवर अनेक सामाजिक, राष्टीय उपक्रम राबविले आहेत.

सुकन्या समृद्धी योजना, मातृत्व योजनेंतर्गत सर्व महिला आधार ड्राईव्ह आणि एईपीएस पेमेंटसारख्या योजनांद्वारे महिलांच्या सुरक्षेवर डाक विभागाने चांगले उपक्रम राबविले. आता डाक विभाग महिलांच्या आरोग्यासाठी काम करणार आहे. सॅनिटरी नॅपकिनचा हा उपक्रम सातारा विभागातील कऱ्हाड, वडूज, फलटण, पाचगणी, कोरेगाव, मेढा, पाटण, ढेबेवाडी या डाक कार्यालयांत सुरू करणार आहे. सी-पेस फाउंडेशनने पुन्हा पुन्हा वापरता येणाऱ्या सॅनिटरी नॅपकिनचा या योजनेत समावेश केला आहे. कमी किमतीत दीड वर्षापर्यंत टिकेल असे नॅपकिन या योजनेतून महिलांना मिळणार आहे. जास्तीतजास्त महिलांनी त्याचा लाभ घ्यावा, असे आवाहन प्रवर अधीक्षिका म्रिधा यांनी केले आहे.