साप्ताहिक राशिभविष्य : (१० नोव्हेंबर २०२४ ते १६ नोव्हेंबर २०२४)

व्यावसायिक येणी वसूल होतील

मेष : अश्विनी नक्षत्राच्या व्यक्तींच्या आयुष्यात भाग्यातील शुक्रभ्रमण मोठी छान भूमिका निभावेल. ता. १४ ते १६ हे पौर्णिमेच्या प्रभावक्षेत्रातील दिवस अनेक माध्यमांतून यश देणारे किंवा विक्रम प्रस्थापित करणारे. भरणी नक्षत्राच्या व्यक्तींना ता. १५ चा शुक्रवार मोठी अजब फळे देईल. वैवाहिक जीवनातून मोठा आनंद साजरा कराल. व्यावसायिक येणी येतील. कृत्तिका नक्षत्राच्या व्यक्तींना शनिवार वेंधळेपणातून नुकसानीचा ठरेल. प्रवासात जपा. अपरिचितांशी वाद टाळा.

आचारसंहितेचे पालन कराच

वृषभ : सप्ताहातील शनी भ्रमणाची स्थिती नोकरीच्या व्यावसायिक आचारसंहिता पाळण्यास लावणारी. वरिष्ठांशी जपून वागा. कोणतेही राजकारण टाळा. उद्याचा सोमवार गैरसमजातून भांडणाचा. बाकी मृग नक्षत्राच्या व्यक्तींना ता. १२ व १३ हे दिवस विशिष्ट भाग्यबीजे पेरतील. न्यायालयीन प्रकरणातून मार्ग निघेल. कृत्तिका नक्षत्राच्या व्यक्तींना मंगळवार व्यावसायिक वसुलीचा. रोहिणी नक्षत्राच्या व्यक्तींना सप्ताहात कला वा छंदाच्या माध्यमातून मोठे यश. पती व पत्नीची चिंता जाईल.

नोकरी-व्यवसायात मोठे लाभ

मिथुन : सप्ताहात शुक्रभ्रमणाचा एक सूर राहील. ता. १२ ते १४ हे दिवस मोठे गतिमान राहतील. पुनर्वसु नक्षत्राच्या व्यक्तींना नोकरी-व्यावसायिक पार्श्वभूमीवर मोठे लाभ होतील. तरुणांना ओळखी-मध्यस्थीतून नोकरीचे प्रस्ताव. आर्द्रा नक्षत्राच्या व्यक्तींना उद्याचा सोमवार शेजारीपाजारी कटकटीचा असेल. काहींना यंत्रे, वाहने किंवा कामगार यातून त्रास. मृग नक्षत्राच्या व्यक्तींना एकूणच सप्ताह विशिष्ट परिस्थितीजन्य लाभ देईल. मित्रांकडून लाभ होईल.

ओळखीने लाभ होतील

कर्क : वक्री स्तंभी शनीची स्थिती सप्ताहावर गुप्तपणानं अंमल करेल. जुनाट आजार किंवा व्याधी यापासून जपा. आश्लेषा नक्षत्राच्या व्यक्ती लक्ष्य होऊ शकतात. उद्याच्या सोमवारचे पर्यावरण मोठे दूषित राहू शकते. प्रवास किंवा गाठीभेटींतून बेरंग होऊ शकतो किंवा अडचणी येऊ शकतात. बाकी ता. १४ व १५ हे दिवस शुभग्रहांच्या प्रभावातील असतील. नोकरी-व्यावसायिक क्षेत्रात भाग्यसंकेत मिळतील. पुष्य नक्षत्राच्या व्यक्तींना ओळखी-मध्यस्थीने फायदे आणि लाभ होतील. सरकारी कामे होतील, पुनर्वसु नक्षत्राच्या व्यक्तींना पौर्णिमा भाग्याची ठरेल.

नोकरीत वरिष्ठांची कृपा राहील

सिंह : पौर्णिमेने समारोप करणारा सप्ताह आपल्या राशीस अद्वितीय स्वरूपाची फळे देईल. मघा नक्षत्राच्या व्यक्तींना सप्ताहाचा शेवट अद्वितीय स्वरूपाची फळे देईल. तरुणांना उत्तम नोकरीच्या संधी येतील. प्रेमिकांचे भाग्य उजळेल. पूर्वा नक्षत्राच्या व्यक्तींवर नोकरीत वरिष्ठांची कृपा राहील. विवाहेच्छुंना तुळसी विवाहाचा बुधवार सुंदर गाठीभेटींचा. उत्तराषाढा नक्षत्राच्या व्यक्तींना पौर्णिमा मानसन्मानाची असेल.

वास्तुविषयक व्यवहारांतून लाभ

कन्या : त्रिपुरारी पौर्णिमेकडे झुकणारा सप्ताह शुक्रभ्रमणातून फलदायी होणारा. ता. १२ ते १४ हे दिवस एक सुंदर ट्रॅक ठेवतील. महत्त्वाच्या कामांचा पाठपुरावा कराच. उत्तरा नक्षत्राच्या व्यक्ती घरगुती उत्सव कार्यांतून नेणारा सप्ताह. काहींना वास्तुविषयक व्यवहारांतून लाभ. हस्त नक्षत्राच्या व्यक्तींना उद्याचा सोमवार सूर्योदयी कलहजन्य. नवपरिणितांनी गैरसमज टाळावेत. बाकी बुधवार वैयक्तिक सुवार्तांच्या प्रभावात ठेवेल. चित्रा नक्षत्राच्या व्यक्तींना पौर्णिमा तीर्थाटनाची ठरेल.

नवीन उपक्रमात यश

तूळ : पौर्णिमेने सांगता करणारा सप्ताह शुक्रभ्रमणातून एक वेगळीच ऊर्जा देणारा आहे. स्वतंत्र व्यावसायिकांना छान फलदायी होईल. नवीन उपक्रम यशस्वी होतील. चित्रा नक्षत्राच्या व्यक्तींना सप्ताहाचा शेवट संमिश्र स्वरूपाचा. प्रवासातील प्रदूषण सांभाळा. स्वाती नक्षत्राच्या व्यक्तींना ता. १४ व १५ हे दिवस व्यावसायिक उत्सव प्रदर्शनातून गाजणारे. विशाखा नक्षत्राच्या व्यक्तींना उद्याचा सोमवार घरगुती कलहाचा. सूर्योदयी वाद टाळाच.

सरकारी अनुदान मिळेल

वृश्चिक : सप्ताह शुक्रभ्रमणातून मोठा सुंदर फलदायी होईल. ता. १२ व १३ हे दिवस आपल्या राशीस एकूणच उत्तम राहतील. तरुणांचं भवितव्य ठरेल. ज्येष्ठा नक्षत्राच्या व्यक्तींची एखादी पुत्रचिंता जाईल. अनुराधा नक्षत्राच्या व्यक्तींना एकादशीचा मंगळवार एखादी महत्त्वाकांक्षा पूर्ण करणारा ठरेल. विशिष्ट सरकारी अनुदानातून लाभ होईल. मात्र उद्या घरातील वृद्धांशी कलह नकोत.

आर्थिक कोंडी संपेल

धनु : सप्ताहात होणारे राशीतील शुक्रभ्रमण पौर्णिमेकडे झुकणारा सप्ताह छान साजरा करेल. मात्र बेकायदेशीर व्यवहार टाळा. उधार-उसनवारीचे व्यवहार जपून करा. बाकी मूळ नक्षत्राच्या व्यक्तींना ता. १२ व १३ हे दिवस व्यावसायिक आर्थिक कोंडी घालवतील. पूर्वाषाढा नक्षत्राच्या व्यक्तींना पौर्णिमेचे प्रभावक्षेत्र वैयक्तिक उत्सव-समारंभ साजरे करणारे. मात्र सप्ताहात एकूणच मौल्यवान वस्तू वा कागदपत्रे जपाच. श्वानदंश सांभाळा. घरातील व्रात्य लहान मुले जपा.

नोकरीच्या विशिष्ट संधी येतील

मकर : सप्ताहातील शनिभ्रमणाची स्थिती आणि चंद्राचे पृथ्वीजवळ निकटोच्च येणे आपल्या राशीस संमिश्ररीत्या परिणामस्वरूप होऊ शकते. उतावीळपणा आवरा. खरेदी-विक्रीचे व्यवहार जपून करा. बाकी तरुणांना ता. १२ ते १४ हे दिवस शिक्षण, नोकरी आणि विशिष्ट स्पर्धात्मक गोष्टींतून अनुकूल राहतील. श्रवण नक्षत्राच्या व्यक्तींना नोकरीच्या विशिष्ट संधी येतील. धनिष्ठा नक्षत्राच्या व्यक्तींना पौर्णिमा संमिश्र स्वरूपाची फळे देईल. घरात वरिष्ठांशी वाद नकोत.

तरुणाईला साथ मिळेल

कुंभ : वादग्रस्त पार्श्वभूमीवर सप्ताह विचित्र लक्षणे दाखवू शकतो. सप्ताहातील शनिभ्रमणाची स्थिती आणि पौर्णिमेजवळचे ग्रहमान आचारसंहिता पाळावयास लावणारे. बाकी सप्ताहातील शुक्रभ्रमण आणि चंद्रकलांचे उसळणे तरुणाईला साथ देईल. शततारका नक्षत्राच्या व्यक्तींना एकूणच ता. १२ ते १४ हे दिवस शिक्षण, नोकरी आणि विवाह या त्रिघटकांतून उत्तम साथ देतील. पूर्वा-भाद्रपदा नक्षत्राच्या व्यक्तींना पौर्णिमा वैवाहिक जीवनातून साजरी होईल.

तरुणांना विलक्षण ऊर्जा मिळेल

मीन : सप्ताहाची सुरवात आणि शेवट शनिभ्रमणाच्या स्थितीतून बोलणारी. शत्रुत्वाच्या पार्श्वभूमीवर जपा. बाकी पौर्णिमेकडे झुकणारा सप्ताह तरुणांना विलक्षण ऊर्जा देईल. ता. १२ ते १४ हे दिवस शुक्रकलांतून साजरे होतील. उत्तरा-भाद्रपदा नक्षत्राच्या व्यक्ती आपल्या कलागुणांतून लक्ष वेधून घेतील. व्यावसायिक उद्‍घाटने होतील. नूतन वास्तू प्रवेश होतील. रेवती नक्षत्राच्या व्यक्तींनी जुगार टाळावा. शेअर बाजारात मस्ती नको. पूर्वा-भाद्रपदा नक्षत्राच्या व्यक्तींना उद्याचा सोमवार विचित्र गाठीभेटी घडवू शकतो.