साप्ताहिक राशिभविष्य : (१७ नोव्हेंबर २०२४ ते २३ नोव्हेंबर २०२४)

मोठा मानसन्मान होईल

मेष : सप्ताहाची सुरुवात आर्थिक व्यवहारांतून सुसंगत राहील. काहींना ओळखी-मध्यस्थीतून मोठे लाभ. काहींना बँकेचे कर्ज मंजूर होईल. भरणी नक्षत्राच्या व्यक्तींचा मार्केटमधील भाव किंवा शेअरची किंमत वाढेल. ता. १७ ते १९ हे दिवस व्यावसायिक प्राप्तींतून गाजतील. तरुणांना हे दिवस नोकरीतील घडामोडींतून भाग्यबीजे पेरणारे ठरतील. कृत्तिका नक्षत्राच्या व्यक्तींना सप्ताहाचा शेवट मोठ्या मानसन्मानातून चकित करेल. अश्विनी नक्षत्राच्या व्यक्तींना सप्ताह नेत्रपीडेचा ठरण्याची शक्यता. बाकी ता. २० व २१ हे दिवस घरात कार्ये ठरवतील.

भागीदारीतून लाभ शक्य

वृषभ : राशीतील गुरुभ्रमण बुधाच्या योगातून तरुणांना शैक्षणिक बाबींतून मार्गस्थ करेल. काहींना परदेशगमनाचे योग येतील. मृग नक्षत्राच्या व्यक्तींना सप्ताहाची सुरुवात वैयक्तिक सुवार्तांची भर देणारी ठरेल. काहींना भागीदारीतून लाभ होईल. सप्ताहाचा शेवट मोठ्या मौजमजेचा राहील. रोहिणी नक्षत्राच्या व्यक्तींना ता. २१ चा गुरुपुष्यामृत योग मोठी दैवी प्रचिती देईल. नवपरिणितांचे प्रश्न सुटतील. कृत्तिका नक्षत्राच्या व्यक्तींना सप्ताहाचा आरंभ संमिश्र स्वरूपाची फळं देईल. भाजण्या-कापण्यापासून सावधगिरी बाळगा. कलाकारांचे या सप्ताहात भाग्योदय होतील.

प्रवासामध्ये आरोग्याची काळजी घ्या

मिथुन : सप्ताहात जुगारसदृश व्यवहार टाळा. कोणताही अतिरेक टाळा. पर्यटनस्थळी सांभाळा. मृग नक्षत्राच्या व्यक्तींना प्रवासात संसर्गबाधेचा त्रास शक्य. बाकी आर्द्रा नक्षत्राच्या व्यक्तींना सप्ताहात विवाहयोग आहे. नोकरीतील विविध घडामोडी प्रसन्न ठेवतील. एखादी गुप्तचिंता जाईल. पती वा पत्नीचा अनपेक्षित उत्कर्ष किंवा भाग्योदय छान साजरा कराल. ता. १९ ते २१ हे दिवस त्यांच्या छंद वा उपक्रमांतून मोठे फलदायी होतील. पुनर्वसु नक्षत्राच्या व्यक्तींना तीर्थाटनांतून प्रचिती येईल.

परदेशामध्ये मोठ्या संधी मिळतील

कर्क : सप्ताहात गुरुभ्रमणाचे पॅकेज अंमल करेल. ता. २० ते २२ हे दिवस हेच पॅकेज राबवतील. त्यातूनच ता. २१ चा गुरुपुष्यामृत आपले शुभत्व प्रकट करेल. आश्लेषा नक्षत्राच्या व्यक्तींना मानसन्मानातून लाभ होतील. एखादी ग्रासलेली पुत्रचिंता जाईल. नवपरिणितांना अपत्यलाभ होईल. पुष्य नक्षत्राच्या तरुणांना परदेशी मोठ्या संधी मिळतील. ता. २० व २१ हे दिवस मोठ्या जल्लोषाचेच ठरतील. पुनर्वसु नक्षत्राच्या व्यक्तींनी सप्ताहात द्वाड मित्रांपासून सावध.

विद्युत उपकरणं जपून हाताळावीत

सिंह : सप्ताह एकूणच शुभ ग्रहांच्या छान संगतीचा. मघा नक्षत्राच्या व्यक्तींच्या नव्या ओळखी होतील. त्यातून भाग्यबीजे पेरली जातील. काहींना जाहिरात माध्यमातून लाभ होतील. पूर्वा नक्षत्राच्या व्यक्तींना राजकीय व्यक्ती अनुकूल होतील. सप्ताहाचा आरंभ आणि शेवट महत्त्वाच्या कामांतून फलदायी होणारा आहे. मघा नक्षत्राच्या व्यक्तींनी सप्ताहात विद्युत उपकरणे जपून हाताळावीत. प्रवासात वाहने जपून चालवा. कामगारांशी विवाद नकोत. उत्तरा नक्षत्राच्या व्यक्तींना नोकरीत बढतीची शक्यता आहे.

विजयाचे दिवस, ठरवाल ते होईल

कन्या : राशीच्या एक्स्चेंजमध्ये आपला शेअर वधारलेलाच राहील. चुरशीतून मोठा विजय प्राप्त कराल. अर्थातच अनेकांना फोटोफिनिश यश मिळेल. सप्ताहात चित्रा नक्षत्राच्या व्यक्ती मोठा भाव खाऊन जाणार आहेत. ता. १९ ते २२ हे दिवस झगमगाटीच राहतील. हस्त नक्षत्राच्या व्यक्ती म्हणतील ते होईल किंवा त्यांना माणसांचे उत्तम सहकार्य लाभत राहील. सप्ताहाची सुरुवात मोठी भावरम्य राहील. गाठीभेटींतून लाभ. मात्र उत्तरा नक्षत्राच्या व्यक्तींनी प्रवासात वस्तू सांभाळाव्यात.

नोकरीत प्रशंसेचे क्षण येतील

तूळ : सप्ताहात आरोग्यविषयक पथ्ये पाळाच. काहींना वेदनायुक्त आजार सतावू शकतात. भाजणं-कापणं सांभाळा. घरातील मौल्यवान वस्तू सांभाळा. बाकी ता. १८ ते २१ या दिवसांत शुभ ग्रहांचा अंडरकरंट साथ देईलच. स्वाती नक्षत्राच्या व्यक्ती त्यांची चांगलीच कनेक्टिव्हिटी साधतील. गुरुपुष्यामृत योग दैवी प्रचिती देईल. नोकरीत प्रशंसा प्राप्त व्हाल. विशाखा नक्षत्राच्या व्यक्तींना खरेदी-विक्रीच्या व्यवहारांतून लाभ होतील. चित्रा नक्षत्राच्या व्यक्तींनी सप्ताहात वेंधळेपणा करू नये. काहींनी अग्निभयापासून काळजी घ्यावी.

कर्जमुक्ती होऊन आर्थिक घडी बसेल

वृश्चिक : सप्ताहात शुभ ग्रहांचं मोठं झुकते माप राहील. तरुणांना मोठा सूर गवसून देणारेच ग्रहमान आहे. ज्येष्ठा नक्षत्राच्या व्यक्तींना सप्ताहाचा आरंभ आणि शेवट घरी आणि दारी उत्तम पर्यावरण ठेवेल. अनुराधा नक्षत्राच्या व्यक्तींना ता. २० ते २२ हे दिवस मोठ्या उत्तम घडामोडींचे. आर्थिक घडी बसेल. काहींना कर्जमुक्तीचा आनंद घेता येईल. तरुणांना नोकरीतील विभागांतर्गत परीक्षांतून यश मिळेल. विशाखा नक्षत्राच्या व्यक्तींनी सप्ताहात प्रिय व्यक्तींशी गैरसमज टाळावेत.

सर्व बाबतीत आचारसंहिता पाळा.

धनु : सप्ताह अपवादात्मक प्रसंगातून बेरंग करू शकतो. प्रवासाच्या वेळा सांभाळा. सप्ताहात तरुणांनी पर्यटनस्थळी जपावे. बाकी सप्ताहात शुक्रभ्रमणाचा छान अंडरकरंट राहील. सप्ताहाच्या सुरुवातीस आणि शेवटास पूर्वाषाढा नक्षत्राच्या व्यक्ती या शुक्रभ्रमणाची कनेक्टिव्हिटी खेचून घेऊ शकतात. ता. १८ व १९ हे दिवस या कनेक्टिव्हिटीचेच राहतील. मूळ नक्षत्राच्या व्यक्तींना सप्ताह संमिश्र स्वरूपाचीच फळे देईल. शनिवारी सर्व बाबतीत आचारसंहिता पाळा.

प्रेमप्रकरणातील अडसर संपेल

मकर : सप्ताहात शुभ ग्रहांचा छान अंडरकरंट राहील. धनिष्ठा नक्षत्राच्या व्यक्ती त्याचा लाभ निश्चितच उठवू शकतात. सप्ताहाचा आरंभ शुभ ग्रहांची सुरावट घेऊनच अवतरेल. सप्ताह स्वतंत्र व्यावसायिकांना उत्तमच संधी देईल. श्रवण नक्षत्राच्या व्यक्तींना विशिष्ट परिस्थितीजन्य लाभ होतील. काहींना राजकीय सहकार्यातून लाभ होतील. उत्तराषाढा नक्षत्राच्या व्यक्तींना परदेशाचे दरवाजे मोकळे होतील. प्रेमप्रकरणातील अडसर दूर होतील. ता. २० आणि २१ हे दिवस छान गाठीभेटींचे आणि नोकरीविषयक मुलाखतींचे असतील

व्यावसायिक नवे उपक्रम गाजतील

कुंभ : शुभ ग्रहांची सुरावट आणि मार्गी झालेला शनी जीवनाला ताल देईल. सप्ताहाची सुरुवात ‘गीत गाता चल’सारखीच राहील. शततारका नक्षत्राच्या व्यक्तींचा कोंडमारा संपेलच. ता. १८ व १९ हे दिवस उत्तम पर्यावरणाचे आहेत. घरात सुवार्तांचा भर राहील. व्यावसायिक नवे उपक्रम गाजतील. पूर्वाभाद्रपदा नक्षत्राच्या व्यक्तींची विशिष्ट शैक्षणिक महत्त्वाकांक्षा पूर्ण होईल. काहींना सामाजिक सन्माननीय पद मिळेल. आई-वडिलांची चिंता जाईल. धनिष्ठा नक्षत्राच्या व्यक्तींनी नोकरीमध्ये बरोबरीचे सहकारी आणि वरिष्ठ यांच्याशी गैरसमज टाळावेत.

नोकरीतील शत्रुत्व संपेल.

मीन : सप्ताहात मार्गी शनीच्या पार्श्वभूमीवर शुभ ग्रहांच्या सुरावटींतून एकप्रकारची मैफीलच जमणार आहे. आजचा रविवार याचीच प्रचिती देईल. एकूणच छान मानसिक पर्यावरणातून सप्ताह जाणार आहे. उद्याची संकष्टी आणि गुरुवारचा गुरुपुष्यामृत आपल्या राशीस एकूणच अष्टसात्त्विक भावांतून सद्गदित करणारा. रेवती नक्षत्राच्या व्यक्तींना दैवी संपत्तीचा लाभ शक्य. नोकरीतील शत्रुत्व संपेल. उत्तरा-भाद्रपदा नक्षत्राच्या व्यक्तींना छान पर्यटनाचे योग. पूर्वाभाद्रपदा नक्षत्राच्या व्यक्तींना विशिष्ट स्पर्धात्मक यश. मात्र सप्ताहात स्नायूपीडेची संभाव्यता. वृद्धांनी आपली काळजी घ्यावी.