साप्ताहिक राशिभविष्य : (२० ऑक्टोबर २०२४ ते २६ ऑक्टोबर २०२४)

वास्तुविषयक व्यवहार होतील

मेष : सप्ताहातील ग्रहमान बुद्धिजीवी मंडळींना मोठे प्रेरक राहील. स्वतंत्र व्यावसायिकांना मोठे भाग्यसंकेत देणारी. भरणी नक्षत्राच्या व्यक्तींना निश्चितच जीवनसत्त्वांचा पुरवठा होईल. विशिष्ट आरोग्य चिंता जाईल. एखादं शत्रुत्व शमेल. अश्विनी नक्षत्राच्या व्यक्तींचा सप्ताहाचा आरंभ विशिष्ट वास्तुविषयक व्यवहारातून होईल. ता. २१ ते २३ हे दिवस आर्थिक व्यवहारांतून गती घेतील. कृत्तिका नक्षत्राच्या व्यक्तींना उद्याचा सोमवार आणि गुरुपुष्यामृत योग जल्लोषाचा ठरेल.

मोठे करार-मदार होतील

वृषभ : सप्ताहात शुभग्रहांची फास्ट ट्रेन पकडणार आहात. ता. २२ ते २४ हे दिवस मोठी सुवार्तांची पार्श्वभूमी ठेवतील. कृत्तिका नक्षत्राच्या व्यक्तींच्या आयुष्यात बलवत्तर असे विवाहयोग आहेत. ओळखींतून विवाहयोग. ज्योतिष आड आणू नका. रोहिणी नक्षत्राच्या व्यक्तींना ता. २४ व २५ हे दिवस दीपोत्सवाची छान चाहूल देतील. व्यावसायिक पातळीवर मोठे करारमदार होतील. शुक्रवार वैयक्तिक उत्सव-समारंभाचा. व्यावसायिक वसुली होईल.

आर्थिक कोंडी दूर होईल

मिथुन : सप्ताहातील बुधोदय तरुणांना नवी जीवनदृष्टी देईल. ता. २२ ते २४ हे दिवस मोठी भाग्यबीजं पेरणारा कालखंड. आर्द्रा नक्षत्राच्या व्यक्तींना नोकरीच्या अनपेक्षित संधी येतील. कलाकारांचं नैराश्य जाईल. व्यावसायिक क्षेत्रातली आर्थिक कोंडी निघून जाईल. घरात भावाबहिणींचे उत्कर्ष होतील. मृग नक्षत्राच्या व्यक्तींच्या आयुष्यात या सप्ताहात मोठे चैनीचे प्रसंग येतील. पर्यटनाचे योग आहेत. पुनर्वसु नक्षत्राच्या व्यक्तींना गुरुपुष्यामृत योग आणि उद्याचा सोमवार दैवी प्रचितीचा ठरेल. व्यावसायिक पातळीवर लॉटरी लागल्यासारखी परिस्थिती निर्माण होईल.

नवविवाहितांसाठी सुंदर पर्व

कर्क : शुभग्रहाचा फास्ट ट्रॅक राहील. महत्त्वाच्या कामांचा पाठपुरावा कराच. उद्याचा सोमवार आश्लेषा नक्षत्राच्या व्यक्तींना अनेक माध्यमांतून हृद्य राहील. एकूणच सप्ताहात देवतांचा अनुग्रह राहील. नवविवाहितांचे एक सुंदर पर्व सुरू होईल. पुष्य नक्षत्राच्या व्यक्तींना सप्ताहातील गुरुपुष्यामृत शुभ घटनांच्या माध्यमातून कायम लक्षात राहील. ता. २२ ते २४ हे दिवस परिस्थितीची मोठी साथ देतील. पुनर्वसु नक्षत्राच्या व्यक्तींचा मानसन्मान होईल.

परदेशगमनाचे संकेत मिळतील

सिंह : सप्ताहात बुध आणि शुक्र या ग्रहांची स्पंदनं संकल्पसिद्धी देणारी राहतील. त्याला गुरुभ्रमणाची उत्तम साथ राहील. आजची संकष्टी नक्षत्रलोकांतून संकेत देईल. ता. २१ ते २३ हे दिवस मघा आणि पूर्वा नक्षत्राच्या व्यक्तींना घरगुती पार्श्वभूमीवर अतिशय प्रसन्न ठेवतील. पती वा पत्नीची चिंता जाईल. नोकरीत मोठे परिस्थितीजन्य लाभ तसेच परदेशगमनाचे संकेत. उत्तरा नक्षत्राच्या व्यक्तींना न्यायालयीन प्रकरणात यश मिळेल.

महत्त्वाकांक्षा पूर्ण होतील

कन्या : आजची संकष्टी आणि गुरुपुष्यामृताची अष्टमी नक्षत्रलोकांतून लाभ देणारी. उत्तरा नक्षत्राच्या व्यक्ती वलयांकित होतील. विशिष्ट महत्त्वाकांक्षा पूर्ण होतील. तरुणांना कॅम्पसमधून नोकरी लागेल. हस्त नक्षत्राच्या व्यक्तींना ता. २० ते २२ हे दिवस महत्त्वाच्या गाठीभेटींतून फलदायी होणारे. ओळखींतून विवाहस्थळं येतील. चित्रा नक्षत्राच्या व्यक्तींना ता. २४ चा गुरुपुष्यामृत योग व्यावसायिक वसुलींतून चमत्कार घडवेल. घरातील तरुणांचा उत्कर्ष होईल.

बदलीमधून लाभ होईल

तूळ : सप्ताहातील बुध आणि शुक्र या ग्रहांची स्थिती मोठी छान स्पंदनशील राहील. त्याचा लाभ घ्यावा. सकारात्मक दृष्टिकोन हवा. ता. २२ ते २४ हे दिवस एकूणच आपल्या राशीस परिस्थितीची साथ देतील. चित्रा नक्षत्राच्या व्यक्तींना शिक्षण, नोकरी आणि विवाह या त्रिघटकांतून संधी देणारे. स्वाती नक्षत्राच्या व्यक्तींना या सप्ताहात वास्तुविषयक व्यवहारांना गती मिळेल. नोकरीत बदलीतून लाभ. ग्रासणारी पुत्रचिंता जाईल.

बुद्धिचातुर्यातून लाभ होतील

वृश्चिक : सप्ताहातील ग्रहमान आणि राशीचं शुक्रभ्रमण तरुणांना मोठा परिस्थितीजन्य लाभ देईल. सप्ताहारंभ गुरुकृपेचाच राहील. अनुराधा नक्षत्राच्या व्यक्तींना यंदाची दिवाळी ऐश्वर्यसंपन्न राहील याचीच ग्वाही मिळेल. ता. २२ ते २४ हे दिवस गतिमान राहतील. ता. २४ च्या गुरुपुष्यामृताची अष्टमी एकूणच भावसमृद्ध राहील. ज्येष्ठा नक्षत्राच्या व्यक्तींना सप्ताहात आपल्या बुद्धिचातुर्यातून मोठे लाभ घडतील. विवाहेच्छू तरुणांच्या गाठीभेटी यशस्वी होतील. वास्तुविषयक कर्जमंजुरी मिळेल.

सरकारी कार्यालयाची मदत मिळेल

धनु : सप्ताहातील बुधाशी होणारे शुभ योग जनसंपर्कातून लाभ देतील. सप्ताहातील ता. २१ ते २३ हे दिवस व्यावसायिक जाहिराती यशस्वी करतील. मूळ नक्षत्राच्या व्यक्तींना उद्याचा सोमवार मुलाखती, गाठीभेटी वा विशिष्ट करारमदारांतून भाग्यबीजं पेरणारा ठरेल. पूर्वाषाढा नक्षत्राच्या व्यक्तींना बुधवार सरकारी माध्यमांतून लाभ देईल. शेअर बाजारातील जुन्या गुंतवणुकीचा लाभ मिळेल. उत्तराषाढा नक्षत्राच्या व्यक्तींची न्यायालयीन प्रकरणातून सुटका होईल.

नोकरीच्या मुलाखतींमध्ये यश मिळेल

मकर : सप्ताहातील शुभग्रहांचा फास्ट ट्रॅक संधींचा फायदा घेऊन देईल. नोकरीतील एक छान पर्व सुरू होईल. सप्ताहाची सुरुवात तरुणांना विशिष्ट स्पर्धात्मक यश देईल. श्रवण नक्षत्राच्या व्यक्तींना ता. २४ व २५ हे दिवस व्यावसायिकदृष्ट्या मोठी तेजी ठेवतील. तरुणांच्या नोकरीच्या मुलाखती यशस्वी होतील. खेळाडूंना सूर गवसेल. धनिष्ठा नक्षत्राच्या व्यक्तींना उद्याचा सोमवार विशिष्ट मानसन्मान देईल. उत्तराषाढा नक्षत्राच्या व्यक्तींना विवाहयोग आहे.

वास्तुविषयक खरेदी-विक्रीतून लाभ शक्य

कुंभ : सप्ताहात शुभग्रहांकडून उत्तम रसद पुरवली जाईल. शिवाय गुरु आणि शनी यांची कॅबिनेट्स आपणास मेहेरबान राहतीलच! सप्ताहाच्या सुरुवातीस तरुणांचं नैराश्य जाईल. उच्चशिक्षणातील अडथळे जातील. धनिष्ठा नक्षत्राच्या व्यक्तींना परदेशातील दरवाजे मोकळे होतील. शततारका नक्षत्राच्या व्यक्तींना ता. २२ व २३ हे दिवस नोकरीतील भाग्यसंकेत देतील. काहींना सरकारी नोकरीचा लाभ होईल. पूर्वा-भाद्रपदा नक्षत्राच्या व्यक्तींना वास्तुविषयक खरेदी-विक्रीतून लाभ होतील. काहींना राजकीय लाभ होईल.

नोकरीतले पर्यावरण प्रसन्न राहील

मीन : सप्ताहातील भाग्यस्थ शुक्रभ्रमण गुरुच्या साथसंगतीतून सुंदर बजेटच घोषित करेल. त्यामुळेच दीपावली साडेसाती विसरायला लावेल. रेवती नक्षत्राच्या व्यक्तींना सप्ताहारंभ नोकरीतील स्वास्थ्य वाढवेल आणि तसेच नोकरीतील पर्यावरण अतिशय प्रसन्न ठेवेल. उद्याचा सोमवार काहींना मानसन्मान देईल. उत्तरा-भाद्रपदा नक्षत्राच्या व्यक्तींसमोरच्या वैवाहिक समस्येतून मार्ग निघेल किंवा एखादी ग्रासलेली गुप्तचिंता जाईल. उत्तम वैद्यकीय सल्ला मिळेल.